ԱԺ «Իմ քայլը» խմբակցության կողմից վարչապետի թեկնածու առաջադրված վարչապետի պաշտոնակատար Նիկոլ Փաշինյանն այսօր ԱԺ ամբիոնից իր ելույթում հիշեցրեց, որ ԱԺ արտահերթ ընտրությունները տեղի են ունենում ՀՀ նախագահի, ԱԺ «Բարգավաճ Հայաստան» և «Լուսավոր Հայաստան» խմբակցությունների հետ ձեռք է բերված պայմանավորվածության արդյունքում։
«Այս ընթացքում շատ քննարկումներ, շահարկումներ են լինում այն մասին, որ ահա, ինչ-որ մի պահի, ինչ-որ ուժեր փորձելու են երկրորդ փուլում այլ սցենար զարգացնել։ Ես նախորդ անգամ ասել եմ այս ամբիոնից, որ, եթե այդպիսի փորձեր լինեն, պայմանավորվածությունները խախտելու, մենք ունենք պատրաստի լուծում` այդ դեպքում «Իմ քայլը» խմբակցությունը կընտրի վարչապետ»,– ասաց Փաշինյանը` հույս հայտնելով, որ պայմանավորվածությունները խախտելու փորձեր, այնուամենայնիվ, չեն արվի։
Նշենք, որ ՀՀ Սահմանադրության համաձայն, արտահերթ ընտրություններ ՀՀ–ում հնարավոր է անցկացնել միայն այդ դեպքում, երբ վարչապետի հրաժարականից հետո խորհրդարանը 2 անգամ անընդմեջ վարչապետ չի ընտրում։
Այդ դեպքում խորհրդարանը լուծարվում է ու նշանակվում են խորհրդարանական արտահերթ ընտրություններ։
Վարչապետ Նիկոլ Փաշինյանը, որը այսօր կնոջ` Աննա Հակոբյանի հետ միասին պատվաստվել են կորոնավիրուսի դեմ, հրաժարվեց պատասխանել հարցին, թե որ պատվաստանյութով է պատվաստվել։ Ազգային ժողովում նրան պատվաստանյութի վերաբերյալ հարցը տվեց ԱԺ նախկին իմքայլական, այժմ անկախ պատգամավոր Թագուհի Թովմասյանը։
«Խնդրում եմ` ասեք, թե կոնկրետ որ պատվաստանյութով եք պատվաստվել այսօր», – ասաց պատգամավորը։
Հարցին ի պատասխան Փաշինյանն ասաց, որ բարձրաստիճան պաշտոնյաները տարբեր պատվաստանյութերով են պատվաստվելու, որպեսզի հանրության շրջանում տիրող կասկածները փարատվեն։
«Ես չեմ ասելու` որ պատվաստանյութով եմ պատվաստվել։ Կասեմ, որ մեր մեկ փոխվարչապետը պատվաստվել է AstraZeneca-ով, մյուս փոխվարչապետը կպատվաստվի Sputnik V-ով, հույս ունեմ, որ Ազգային ժողովի նախագահությունից որևէ մեկն էլ կպատվաստվի չինական պատվաստանյութով»,– ասաց Փաշինյանը։ Ազգային ժողովում նրա հայտարարությանը համընդհանուր ծիծաղ հետևեց։
Վարչապետը ընդգծեց, որ եթե առողջապահության նախարարությունը թույլ է տվել որևէ պատվաստանյութ մտնի շրջանառության մեջ, ուրեմն այն խնդիր չի առաջացնում։