Կենտրոնական բանկի նախագահը երեկ արձագանքել է Գագիկ Ծառուկյանի՝ մինչև երեք միլիոն վարկերի զրոյացման առաջարկին: Ծառուկյանի առաջարկը տեղին է, արդիական և քննարկվել է տարբեր մասնագետների հետ: Այս մասին այսօր ԱԺ-ում ասաց «Բարգավաճ Հայաստան» խմբակցության պատգամավոր Միքայել Մելքումյանը:
«ԿԲ նախագահի մեկնաբանությունն ապացուցում է մեր առաջարկի հիմնավորվածությունն առ այն, որ ժամանակակից բանկերում զրոյացում կիրառվել է վարկառուների տարբեր խմբերի համար, որի արդյունքում վարկառուների 50%-ի վիճակը բարելավել է, մյուս 50 %-ի դեպքում խնդրահարույց է եղել»,-ասաց Մելքումյանը:
ԲՀԿ պատգամավորը նշեց, որ իրենց առաջարկած տնտեսական միջոցառումը պետք է իրականացվի նոր տնտեսական քաղաքականության պայմաններում.
«Մենք չենք ասում, որ վարկերի ներումը լինելու է և զուգահեռ է գնալու այն տնտեսական քաղաքականությանը, որը հիմա վարում են: Լրիվ նոր տնտեսական քաղաքականություն է լինելու: Եթե նայենք վարկերի դինամիկան, կտեսնենք, որ վերջին 3 տարիների ընթացքում վարկերը 1 միլիոն 650 հազարից աճել են 2 միլիոն 200 հազարից ավել, իսկ եթե նայում ենք վարկերի կառուցվածքը կտեսնենք, որ այդ վարկերի մի մասը սպառողական են, մի մասը՝ գյուղացիական, մի մասը՝ ուսանողական, այսինքն՝ մարդիկ չեն կարողանում ապրել, վարկեր են վերցնում, որ գոյատևեն: Մեր կուսակցության ղեկավարը բազմիցս նշել է, որ այդ բանկային համակարգը լոմբարդային համակարգ է»,-ասաց Մելքումյանը՝ հավելելով, որ եթե այսպես շարունակվի ևս մեկ տարի հետո կարող է բնակչության քանակից ավել վարկեր ունենանք:
Մելքումյանը վստահեցրեց, որ իրենց առաջարկած տնտեսական միջոցառումն անհրաժեշտ է, որպեսզի քաղաքացիներն ազատվեն վարկերից.
«Պետք է Գագիկ Ծառուկյանի առաջարկն իրագործվի, որպեսզի մեր համաքաղաքացիներին ազատագրենք վարկերից, հետո բանկային համակագն այնպես աշխատի, որ վարկերը ճիշտ ուղղությամբ աշխատեն, այլ ոչ թե վարկը տանք և վարկառուին մոռանանք: Սա համալիր քաղաքականություն է լինելու, որի անունը մենք դրել ենք լրիվ նոր տնտեսական քաղաքականություն: Մենք թույլ չենք տա, որ վարկերը ուտեն մեր քաղաքացիներին, ինչպես ժամանակին Անգլիայում եղավ. սա հստակ հակադարձում ԿԲ նախագահի մեկնաբանությանը»,-ասաց Մելքումյանը: