Այն քաղաքացիները, որոնք կունենան պատվաստման հավաստագիր, կկարողանանք ՀՀ մուտք գործել առանց լրացուցիչ կորոնավիրուսի թեստ հանձնելու։ Համապատասխան նախագծի որոշմանը գործադիրը հավանություն տվեց կառավարության այսօրվա նիստի ժամանակ։
ՀՀ առողջապահության նախարարի պաշտոնակատար Անահիտ Ավանեսյանը նշեց, որ փորձում են պատվաստումային գործընթացին զուգահեռ թեթևացնել կարանտինի մասին որոշման կետերը։
«Այս նախագծով այն քաղաքացիները, որոնք կունենան պատշաճ պատվաստման հավաստագիրը՝ կանաչ անձնագիրը, այսուհետև Հայաստան գալու համար լրացուցիչ կորոնավիրուսի թեստի հանձնման կարիք չեն ունենա։ Այսինքն ՊՇՌ թեստի բացասական արդյունքը և պատվաստման կանաչ անձնագիրը հավասարապես կգործեն որպես սահմանի հատման պահանջ։ Սա մեր երկիր մուտք գործելու պահանջն է։ Այլ երկրների քաղաքականությունը ևս փոփոխվում է ժամանակի ընթացքում և պետք է ուշադիր լինել երկրից մեկնելու համար ու նայել, թե տվյալ երկիրն ինչ պահանջներ ունի»,-ասաց նախարարի պաշտոնակատարը։
Անահիտ Ավանեսյանը նշեց, որ մինչև մեկ տարեկան երեխաների մուտքի դեպքում նույնպես անհրաժեշտ չի լինի ՊՇՌ թեստավորում ունենալ. «Ուսումնասիրություններից հետո եկանք այն եզրակացության, որ մինչև 1 տարեկան երեխաներին զերծ պահենք, քանի որ եթե ընտանիքի անդամների մոտ արդյունքը բացասական է, ուրեմն հավանականությունը շատ մեծ է, որ նրա թեստի արդյունքը ևս բացասական կլինի»,-նշեց նախարարի պաշտոնակատարը։
ՀՀ վարչապետի պաշտոնակատար Նիկոլ Փաշինյանը նշեց, որ Հայաստանի զբոսաշրջային ոլորտը վերականգնման թույլ նախանշաններ է ցույց տալիս, հետևաբար կարևոր է, որ զբոսաշրջիկներին հնարավորություն տան առանց հավելյալ ստուգումների մուտք գործել երկիր։