«ՌԴ-ն կոչ է անում զերծ մնալ Ղարաբաղյան խնդրի խաղաղ կարգավորման գործընթացը քաղաքականացնելուց: Նման փորձերը գլխիվայր շուռ են տալիս գործընթացը»,- Ռուսաստանի Դաշնության արտաքին գործերի նախարար Սերգեյ Լավրովն այսօր Երևանում անցկացված մամուլի ասուլիսի ժամանակ կոչ է արել զերծ մնալ նաև ճանապարհների ապաշրջափակման հարցը քաղաքականացնելուց։
«Երբ մարդիկ՝ բոլոր սահմանափակումների, սանկցիաների վերացումներից հետո սկսեն զգալ խաղաղ կյանքի օգուտները, նրանք այլ կերպ կդիտեն հարցերին, որոնք այսօր որոշ մեր գործընկերներ փորձում են սրել ու դրանք առաջին պլան բերել։ Պետք չէ հիմա քաղաքականացնել գործընթացը։ Այն բավականին բարդ է ընթանում, որովհետև որոշվում են տրանսպորտների, ուղիների, տարածաշրջանի միավորման հարցեր, որոշվում են շփման գծի, նաև սահմանների դելիմիտացիայի և դեմարկացիայի հարցեր։ Դրանք հասկանալի հարցեր են, որոնք լուծելուց հետո տարածաշրջանը խորը շունչ կքաշի ու խաղաղ կապրի։ Նրանք, ովքեր մտածում են այս հարցերը թողնել ապագային ու սկզբում զբաղվել քաղաքական երկխոսությամբ, կարծում եմ՝ ամբողջ գործընթացը գլխիվայր շուռ են տալիս։ Ավելի հեշտ է լուծել քաղաքական հարցերը, երբ մարդիկ սկսեն ապրել նորմալ՝ եվ հայերը, եվ ադրբեջանցիները միասին, ինչպես եղել է շատ տասնամյակներ»։