ՀՀ ԱԺ «Լուսավոր Հայաստան» խմբակցության պատգամավոր Աննա Կոստանյանը հայտարարել է, որ ահազանգեր է ստացել զոհված կամ վիրավորված զինծառայողների ծնողների նկատմամբ դրսեւորված անբարյացակամ վերաբերմունքի մասին։
«Ինձ դիմել են կոմայի մեջ գտնվող զինծառայողի ծնողները, ում հետ շատ անշնորհք ձևով է վարվել ստորին օղակներում աշխատող աշխատակազմը»,- ԱԺ-ում հայտարարել է պատգամավորը՝ ՄԻՊ Արման Թաթոյանից հետաքրքրվելով, թե արդյոք ՄԻՊ աշխատակազմը եւս ահազանգ ստացել է զինծառայողների ծնողների նկատմամբ աշխատանքի և սոցիալական հարցերի նախարարության աշխատակիցների կողմից դրսեւորված անբարյացակամ վերաբերմունքի մասին։
Ի պատասխան Արման Թաթոյանը նկատեց, որ զոհված կամ վիրավորում ստացած զինծառայողների ծնողների հանդեպ համակարգված վատ վերաբերմունք մարդու իրավունքների պաշտպանի գրասենյակը չի արձանագրել:
«Հնարավոր է, որ եզակի դեպքեր լինեն, դա անթույլատրելի է և մենք դրանց արձագանքում ենք: Որպես կանոն, դրանք կապված են ինֆորմացիայի պակասի հետ։ Պատերազմից հետո անհայտ կորածների հարազատները կարիք ունեն, որ պետությունն աշխատի իրենց հետ, ինֆորմացիա տրամադրի, հարգալից լինի: Սակայն համակարգված խնդիր մենք չենք արձանագրել», – նկատեց Թաթոյանը: