Երկրի քաղաքական իշխանությունները հաճախակի փոխելով ԱԱԾ ղեկավարներին՝ դրանով թուլացրել են ԱԱԾ-ն ու պետության հիմքերը,- այսօր հայտարարել է ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանը։
ԱԱԾ պահեստազորի սպաների միության խորհրդի այսօրվա ասուլիսում Ա.Վանեցյանը խոսել է 2018 թվականի իրադարձություններից հետո ԱԱԾ-ի շուրջ տեղի ունեցող զարգացումների մասին՝ բարձրաձայնելով իր մտահոգությունները։
«Իմ նշանակումը սովորական նշանակում չէր։ Երկրում տեղի էին ունեցել մեծ փոփոխություններ, այն ժամանակ ասում էին հեղափոխություն, իսկ հիմա հասկանում ենք, որ հեղաշրջում է»,- ասել է Ա.Վանեցյանը՝ նշելով, որ պաշտոնն ստանձնելուց հետո խնդիր էր դրել փոխել ԱԱԾ-ի հետ կապված վատ կարծրատիպերը։
«Ժողովրդի մոտ կար վատ կարծրատիպ, մեզ նույնականացնում էին նախկին վատ բարքերի, ԿԳԲ-ի հետ եւ կարիք կար կոտրելու դա, որ ԱԱԾ-ին սկսեին վստահել, հավատալ, տեսնեին ոչ թե սպառնալիք, այլ վստահություն, մարդկանց, որոնք կանգնած էին իրենց հայրենիքի եւ ժողովրդի պաշտպանության համար»,- նշել է Ա.Վանեցյանը՝ ավելացնելով, որ իրենց քայլերի շնորհիվ կարճ ժամանակահատվածում ԱԱԾ-ն ՀՀ-ում դարձել է ամենահեղինակավոր կառույցներից մեկը։
«Միքայել Համբարձումյանի, մյուս գործընկերների հետ ուս-ուսի տված արել ենք շատ մեծ գործ, գրանցել շատ մեծ արդյունքներ ու փորձել ամեն ինչ անել, որ երկիրը կայունանա»,- հայտարարել է Ա. Վանեցյանը։
Նրա արձանագրմամբ՝ 2019 թվականի սեպտեմբերին իր հրաժարականի դիմումի մեջ փորձել է մատչելի ներկայացնել այն պատճառները, որոնք ստիպել են իրեն հրաժարական ներկայացնել։
«Այն կանխատեսումները, որոնք կային իմ հրաժարականի տեքստում, ցավոք, գրեթե ամբողջությամբ իրականություն դարձան։ Տեսնում ենք միտում 3 տարվա մեջ ԱԱԾ տնօրենի 5 փոփոխության հարցում։ Այս կառույցում ղեկավարներին այդքան հաճախ չեն փոխում, իսկ եթե փոխում են, ապա պետք է հստակ բացատրություն ներկայացնեն»,- ընդգծել է Արթուր Վանեցյանը։
Նրա խոսքերով՝ ինքը եւ Միքայել Համբարձումյանը մատնանշել են իրենց հրաժարականի պատճառները, իսկ մյուսների պարագայում լայն հանրությունը ոչինչ չգիտի։
«Փորձելով թուլացնել ԱԱԾ ծառայությունը այս իշխանությունները փորձել են թուլացնել պետության հիմքերը։ Սա է մեր դիրքորոշումը»,- հայտարարել է Ա.Վանեցյանը։