Պետությունը շուրջ 1,9 միլիարդ դրամ կհատակցնի մանկատան շուրջ 300 շրջանավարտի բնակարանային աջակցությանը: Շահառուներին կտրամադրվի 6,3 միլիոն դրամ արժողությամբ բնակարանների գնման վկայագրեր: Համապատասխան նախագիծն այսօր կառավարության նիստում զեկուցեց Աշխատանքի և սոցիալական հարցերի նախարար Զարուհի Բաթոյանը (հարց համար 35):
ՀՀ վարչապետ Նիկոլ Փաշինյանի խոսքերով, Հայաստանի բազմաթիվ բնակարավայրերում այդ գումարով հնարավոր է բնակարան գնել. «Բայց եթե մարդը միջոցներ ունի և ավելի թանկ բնակարան է ուզում ձեռք բերել, կարող է դա անել: Ես ցանկանում եմ ընդգծել, որ մենք խնդիրը լուծում ենք խնայողությունների միջոցով, իսկ ավելի ճիշտ՝ մեր հակակոռուպցիոն քաղաքականության արդյունքում խնայված, գոյացած միջոցների հաշվին»:
Փաշինյանը նշեց, որ համաձայն է մանկատան երեխաների հետ բնակարան գնելու նախագծի հետ, սակայն նման որոշման հետ ռազմավարական առումով հայեցակարգային խնդիր ունի. «Ես կնախընտրեի, որ այս 1,9 միլիարդը այն ժամանակ ծախսված լիներ նրանց կրթության վրա, որպեսզի նրանք հիմա որևէ մեկի կարիքը չունենային, այսօր գնային օրինակ IT ոլորտում աշխատեին ու իրենց վաստակած աշխատավարձով բնակարան գնեին: Այսօր այդպիսի վերաբերմունք չենք կարող ունենալ, քանի որ 20 տարի առաջ այս քաղաքականությունը չի վարվել: Հիմա բնակարան ենք տալիս, իսկ հետո ի՞նչ է լինելու, ինչ երաշխիք ունենք, որ նրանք ստիպված չեն վաճառել այդ բնակարանները:
Մանկատան երեխաների նկատմամբ մեր ամենամեծ պարտավորությունը պետք է լինի կրթություն տալը, որպեսզի նրանք կարողանան հասուն տարիքում իրենց բարեկեցությունն ապահովեն արժանապատիվ, ազնիվ աշխատանքով՝ չունենալով որևէ մեկի գթասրտության անհրաժեշտությունը: Պետք է ռազմավարական հստակ մոտեցումներ ունենանք, այսօր ստեղծենք պայմաններ, որպեսզի 20 տարի հետո մանկատնից դուրս եկած երեխաները կառավարության մոտ հացադուլ անելու անհրաժեշտություն չունենան»: