ԱԺ պատգամավոր Թագուհի Թովմասյանը խորհրդարանում լրագրողների հետ զրույցում տեղեկացրել է, որ անզեն աչքով նկատելի է՝ թշնամին բավականին առաջ է եկել, և այն հատվածները, որոնք փորձել էինք գոնե չեզոք գոտում պահել, այլևս չկան:
«Պաշտպանություն ակնհայտորեն չկա: Նույնիսկ վարչապետն է ասում, որ առանց կրակոցի 3,5 կմ խորացել են: Նշանակում է՝ մենք չունենք ոչ միայն համապատասխան կահավորանք, այլև ներուժ՝ դիմակայելու, կամ՝ չենք ուզում: Դա ամենակարևոր հարցն է՝ ինչո՞ւ»,-նկատեց խորհրդարանականը:
Պատգամավորն ընդգծեց, որ խիստ անհրաժեշտ է, որ ԱԺ արտահերթ նիստ հրավիրվի, որի ընթացքում կքննարկվի սահմանին տիրող իրավիճակը, պատկան մարմիններ հրավիրեն՝ բացատրություներ տալու։ Պատգամավորը նշեց, որ պաշտոնական օղակները հստակ պետք է մի շարք հարցերի պատասխանեն։ Պատգամավորի կարծիքով, ԳՇ պետը պետք է պատասխանատվություն կրի, որովհետև կորցրել ենք ՀՀ սահմանային անվտանգությունն ու անձեռնմխելիությունը։
«Սա՞ է անվտանգությունը՝ քնենք արթնանանք, տեսնենք ադրբեջանցիները մի քիչ էլ են եկե՞լ, չեք կարող, գնացեք։ Ես հետևողական եմ լինելու: Անպատասխանատվությունը չի կարող հավերժ շարունակվել։ Մենք մեզ չենք կարող արդարացնել, որ հետպատերազմական վիճակում ենք։ 6 ամիս անցել է՝ խրամատ փորելը ի՞նչ կապ ունի հետպատերազմական վիճակի հետ, մենք ինչ է՝ տրակտոր չունե՞նք, թե՞ վարորդ չունենք»:
«Քանի մենք խառն ենք, իրար ենք ուտում, իրենք մի քիչ ընդլայնվում են». ԱԺ պատգամավոր Թագուհի Թովմասյանը կարծում է, որ ադրբեջանական գործողությունները մեծապես պայմանավորված են երկրում առկա անկայուն վիճակով։
«Մենք հետպատերազմական որևէ հրատապ քայլ չենք իրականացրել, մեր սահմանագիծը գծագրել է Ադբեջանը, շարունակում է ամրապնդել Ադրբեջանը»։
Պատգամավորը կարևորում է այս փուլում ռազմական դրություն հայտարարելը, հավելելով, որ ավելին՝ վաղուց պետք է հայտարարվեր։
«Այն օրերին, երբ Հայաստանի սահմաններին որևէ ոտնձգություն չկար, ռազմական դրություն էր պահապնվում, որ Նիկոլ Փաշինյանը վարչապետի աթոռը պահպաներ: Հիմա իրապես ՀՀ սահմանային անվտանգությունը վտանված է, բայց մենք ռազմական դրություն չենք հայտարարում: Տրամաբանությունը որևէ կերպ չեմ հասկանում», – լրագրողների հետ զրույցում ասաց պատգամավորը։
Իսկ այս փուլում առաջիկա արտահերթ խորհրդարանական ընտրությունների մասին խոսելը պատգամավորն անբարոյականություն է համարում:
«Մենք երկիր ենք կորցնում, մտնում են մեր տուն, ու մենք գնում, ցուցակ ենք կազմում, քարոզարշավի անում։ Զավեշտալի է՝ ապահով մարզեր են գտնում, գնում, իրենց համար քարոզարշավ անում։ Հայրենիքը վտանգված է, քաղաքացիները, որ կանգնած են առաջնագծում, զենք չունեն ինքնապաշտպանվելու», – նշեց Թովմասյանը: