Արթուր Վանեցյանը ժամանակին գիտակցեց նորելուկ շնագայլերի ողջ իրական էությունը, անձամբ կանգ առավ և կոչ արեց նաև մյուսներին։ «Պատիվ ունեմ» դաշինքի ձևավորման արարողության ժամանակ այս մասին ասաց ՀՀ երրորդ նախագահ Սերժ Սարգսյանը։
«Դժվար թե գտնվի մի մարդ, որն այս իշխանությունների հետապնդումներից ավելի է տուժել, քան ես, իմ ընտանիքն ու մերձավոր շրջապատը։ Հայաստանում պետք է ոչ թե 5000 նոր գերեզման ավելանար, այլ 5000 նոր հարսանիք, կնունք ու ծնունդ լիներ։ Եռագույններ պետք է ծածանվեին ոչ թե մեր հերոսների շիրիմներին, այլ հայոց բանակի հաղթական շքերթներին։ Մեր արցունքները պետք է ուրախության, այլ ոչ թե ողբերգության հույզերից ծնվեին, և այդ լուսավոր տղաներին, նրանց ընտանիքներին, ողջ ժողովրդին բոլորս պարտք ենք արժանապատվություն, հույս, խաղաղ ու անվտանգ, բարեկեցիկ և հզոր Հայաստան»,-նշեց երրորդ նախագահը։
Վերջինս նշեց, որ անցյալին վերադարձ չի լինելու, սակայն նա, ով չի խոստովանում անցյալի սխալները, չունի քաջություն, իսկ ով չի գնահատում անցյալի ձեռքբերումները, չունի ազնվություն։