Ես հեղափոխություններին կողմ չեմ, բայց ստեղծվել էր նոր իրավիճակ, որը հույս էր տալիս, որ մեր պետությունը ինչ-որ ճանապարհով պետք է գնա, նոր փուլ էր սկսվում․ այս մասին այսօր ասաց Հանրային խորհրդի նախագահ Վազգեն Մանուկյանը` անդրադառնալով կառույցի շուրջ ստեղծված իրավիճակին ու հետագա քայլերին:
«Ինչ-որ տեղից հետո ես սկսեցի հիասթափվել, քանի որ տեսա, որ ինչ-որ արվում է, մեզ չի տանելու այդ ուղղությամբ: Ինձ համար ընդունելի չէր վեթինգի մասին, անցումային արդարադատության մասին քննարկումները, Մարտի մեկի դատավարությունը քաղաքականացնելը, և ես, անհանգստացած, հունիսին որոշեցի Նիկոլ Փաշինյանին հանդիպել և իմ կասկածները, խորհուրդները հաղորդել»,-ասաց նա:
Վազգեն Մանուկյանը նշեց, որ այդ ընթացքում 2 երկու անգամ զանգել է վարչապետին, սակայն վերջինս հետ չի զանգահարել: «Դա աննախադեպ էր, քանի որ այդպիսի բան ո՛չ իր հետ էր եղել, ո՛չ Սերժ Սարգսյանի, ո՛չ Ռոբերտ Քոչարյանի և ոչ էլ Լևոն Տեր-Պետրոսյանի հետ»,-ասաց նա:
Նա նշեց, որ ինչից ինքը անհանգստանում էր ամռանը, նույն կերպ շարունակվում է ներկայումս: «Որոշակի վախի մթնոլորտ կա շատ մարդկանց մոտ, որովհետև պարզ չէ, թե ում մոտ կարող են մտնել, ում կարող են ձերբակալել, եթե սկիզբը դրված էր կոռուպցիայի դեմ պայքար, հիմա ուրիշ ձև է գնում իշխանությունը: Ես տեսնում եմ, որ ես ապրում եմ մի երկրում, որը շատ ավելի մոտ է 37 թվին, քան Անկախության հռչակմանը: Այս վտանգը բոլորի շեմին է կախվել: Ես կարծում եմ, որ հասարակությունը պետք է դիմադրի և բացատրի իշխանություններին այդ քայլերի վտանգավորությունը Հայաստանի համար, մենք շատ ենք թուլանալու, հետ ենք գնում»,-ասաց նա:
Վազգեն Մանուկյանը նշեց, որ հին փուլը երբեք չի կրկնվելու: «Ես գտնում եմ, որ պետք է դիմադրել, բացատրել, որովհետև շատ բան բացատրելով է ստացվում, ես չեմ կարծում, որ մտածված ծրագիր է գնում, ուղղակի ակամայից է ստացվում»,-ասաց նա:
Հանրային խորհրդի անդամները քննարկեցին՝ արդյոք Խորհուրդ պե՞տք է, թե՞ ոչ: «Մի կողմ թողնենք, որ դա սահմանադրական մարմին է, և առանց Սահմանադրությունը փոխելու, միևնույն է, չեն կարող փակել»,-հավելեց խորհրդի նախագահը: