Նիկոլ Փաշինյանը հավասար է աղետի, նա ոչնչացրեց մեր անվտանգային համակարգը։ Մենք պետք է հերթական անգամ ընդգծենք մեզ հետ կատարվող աղետի և Նիկոլ Փաշինյանի միջև կապը: Այս մասին մամուլի ասուլիսի ժամանակ ասաց ռազմական փորձագետ Դավիթ Ջամալյանը:
Ռազմական փորձագետը կարծում է, որ վերջին երեք տարիների ընթացքում Հայաստանի սահմանները հակառակորդի համար բացվել են։
«Հայաստանը վերածվել է «проходной двор» ադրբեջանցիների համար: Հարց է առաջանում, ինչու մեր ուժերը չեն դիմադրում և կրակ չեն բացում: Նախկինում Հայաստանի և Արցախի փաստացի սահմանը հսկում էր բանակը, որպեսզի հնարավոր ագրեսիայի դեպքում արձագանքի: Մարտական հենակետերը միշտ եղել են։ Եթե հենակետի վրա հարձակում լիներ, հենակետի ավագը իրավունք ուներ առանց վերադասին զեկուցելու, կրակ բացել: Այս սխեման կանխում էր ադրբեջանական դիվերսիաները։ Հիմա այլ է»,- շեշտեց Ջամալյանը՝ տարակուսելով, թե ինչո՞ւ է մեր սահմանները եղել անպաշտպան, որ կարողանան մտնել և լկտիաբար գերեվարել են մեր զինծառայողներին:
Ռազմական փորձագետը անդրադառնալով երեկվա՝ Նիկոլ Փաշինյանի Գեղարքունիքի Կութ համայնք այցին, կարծում է, որ Փաշինյանը ցանկանում է սահմանազատման անվան տակ սահմանամերձ տարածքներ հանձնել թշնամուն: Փաշինյանի առաջարկը՝ որ Հայաստանի և Ադրբեջանի զինվորական ստորաբաժանումները հեռանում են Սոթք-Խոզնավար սահմանային հատվածից, դրա փոխարեն սահմանագծի երկայնքով տեղակայվում են դիտորդներ, որից հետո տեղի են ունենում սահմանային կետերի ճշգրտման աշխատանքներ, փորձագետը սխալ մոտեցում է համարում։
«Դա նշանակում է, որ դու առնվազն ընդունում ես, որ Արցախի Շահումյանի և Քաշաթաղի շրջանի հյուսիսային թևը Ադրբեջանի տարածքն է, այսինքն՝ դու լեգիտիմացնում ես ադրբեջանական օկուպացիայի հետևանքները: Սոթքից մինչև Խոզնավար այդ պայմանական սահմանից այն կողմ ոչ թե Ադրբեջանն է, այլ Արցախի Հանրապետության Շահումյանի և Քաշաթաղի շրջանի հյուսիսային թևը։ Եթե սահմանազատման պրոցես ես սկսում և ընդունում ես, որ այդ հատվածում ՀՀ-ի և Ադրբեջանի սահման պետք է անցնի, նշանակում է սահմանից այն կողմի տարածքն ընդունում ես իբրև Ադրբեջանի տարածք»,-կարծում է Ջամալյանը՝ հայտարարելով, որ ՀՀ նախկին դեսպան Միքայել Մինասյանի հրապարակած փաստաթուղթը Փաշինյանն այս պահին ստորագրել չի կարող, հետևաբար մասնակի է բավարարում Ալիևի պահանջները։