Նման արտահայտություններ անողները պատկերացում չունեն, թե ինչ է բանակը, ինչպիսին է եղել բանակի կայացման և զարգացման ամբողջ ընթացքը և չհարգելով բանակի անձնակազմին՝ նման արտահայտություններ են անում։ Լրագրողների հետ զրույցի ժամանակ ասաց ՀՀ պաշտպանության նախկին նախարար, «Հայաստան» դաշինքի անդամ Սեյրան Օհանյանը՝ անդրադառնալով Նիկոլ Փաշինյանի այն արտահայտությանը, որ երբ կոնֆետ էին նետում, զինվորները ճանկռտելով կոնֆետի հետևից էին վազում։
«Մարդիկ, որոնք բանակում չեն ծառայել և ամբողջ կյանքում ինչ-որ տարբեր գործերի, պաշտոնների մակերեսի վրա պառկած են անցկացրել իրենց ամբողջ կյանքը՝ տարբեր մուտիլովկաներով։ Դա հարված է սեփական բանակին։ Մեր բանակը երբևիցե սոված չի եղել։ Առաջին հարցը կարող են ուղղել իրենց ցուցակում ընդգրկված այն մարդկանց, որոնք երկար տարիներ զբաղվել են բանակի նյութատեխնիկական խնդիրներով։ Զինվորը երբևիցե որևէ բան չի ճանկռտել»,-նշեց Սեյրան Օհանյանը։
Նա հավելեց՝ բանակի զարգացման խնդիրները, նպատակներն ու ծրագրերն այնպիսինն են, որ տարիների ընթացքում զարգացում են ապրել և նրա խոսքով այսօրվա իշխանությունն այդ զարգացման ծրագրի հետ որևէ կապ չունի։
«Իմ ժամանակահատվածում ամեն 6 ամիսը մեկ կոնֆերանսներ ենք անցկացրել, սննդի բարելավում է տեղի ունեցել, հատկապես այնպիսի սննդի տեսականի, որը մարտական հերթապահության ժամանակ բարձրացնում է զգոնությունը։ Օրինակ քաղցրավենիք, հավելյալ թեյ, որոնք քնելու ժամանակահատվածում բարձրացնում են զգոնությունը»,-նշեց Սեյրան Օհանյանը։