Ուզում եմ շեշետել, որ եթե Տիգրանաշեն գյուղը հանձվի թշնամուն, ապա Սյունիք եւ Վայոց Ձոր այցելելու համար պետք է 12 կմ անցնեն Ադրբեջանի տարածքով, իսկ դրա համար պետք է ունենան Ադրբեջանի վիզա. Այս մասին ֆեյսբուքում ուղիղ եթերի ընթացքում ասաց Սահմանադրական դատարանի աշխատակազմի նախկին ղեկավար Էդգար Ղազարյանը, որը «Զրո ձայն թշնամուն» նախաձետնության շրջանակներում գտնվում է Վայոց Ձորում։
Էդգար Ղազարյանի խոսքով՝ նոյեմբերի 9-ին ստորագրած կապիտուլյացիոն հայտարարությամբ Ադրբեջանի արևմտյան շրջանները Հայաստանի կողմից երաշխավորված անվտանգ ենթակառուցվածքներով պետք է կապվեն Նախիջևանի հետ:
«Ասեմ ավելին, քանի որ նույն այդ կապիտուլյացիոն հայտարարությամբ Ադրբեջանի արևմտյան շրջան է դարձել նաեւ Քելբաջարը, այդ կապը պետք է իրականացվի Վայոց ձորի տարածքով: Այսինքն, Ջերմուկի մոտով պետք է գան Վայքով, Խնձորուտ գյուղով, Խնձորուտ-Զառիթափ ճանապարհով գնան Նախիջևան: Սա այն է, ինչը ստորագրված է նոյեմբերի 9-ի հայտարարությամբ»,-շեշտեց Ղազարյանը՝ նշելով, որ այս ամենը ձախողելու համար մենք պետք է այդ փաստաթղթի տակ ստորագրողին վռնդենք:
ՍԴ աշխատակազմի նախկին ղեկավարը նկատեց, որ Փաշինյանը խոստովանել է, որ ուղիղ կապի մեջ է գտնվում Ադրբեջանի նախագահի հետ, բանակցություններ է վարում: Եվ այդ բանակցությունների նպատակը՝ ըստ Ղազարյանի, ոչ թե մեր ռազմագերիների վերադարձն է, այլ՝ հայ-ադրբեջանական սահմանների տեղորոշելը։
«Նաև հնարավոր է քննարկվի այսպես կոչված անկլավների հարցը, որը հնարավոր է հանձնեն Ադրբեջանին: Ուզում եմ շեշետել, որ եթե Տիգրանաշեն գյուղը հանձվի թշնամուն, ապա Սյունիք եւ Վայոց Ձոր այցելելու համար պետք է 12 կմ անցնեն Ադրբեջանի տարածքով: Իսկ դրա համար պետք է ունենան Ադրբեջանի վիզա», – եզրափակեց Ղազարյանը: