«Լուսավոր Հայաստան» կուսակցությունն Աջափնյակ համայնքում մեկնարկել է իր նախընտրական քարոզարշավը։
ԱԺ «Լուսավոր Հայաստան» խմբակցության քարտուղար Գևորգ Գորգիսյանը լրագրողների հետ զրույցի ժամանակ ասաց, որ հիմա ունենք սուպերվարչապետական համակարգ, ինչը հանգեցրել է նրան, որ կա վարչապետ գրեթե բացարձակ իշխանությամբ։ Գևորգ Գորգիսյանը նշեց, որ ավելի բալանսավորված համակարգ ունենալու համար պետք է լիազորությունների մի մասը նախագահին և ԱԺ-ին տրամադրվի, որպեսզի ամբողջ երկրի ճակատագիրը մեկ անձից կախված չլինի։
Անդրադառնալով անվտանգային խնդիրներին, Գևորգ Գորգիսյանն ասաց. «Որևէ լուրջ խնդիր չենք կարողանալու լուծել, եթե շարունակենք այսպես պառակտված լինենք։ Տեսնում ենք՝ ինչ մակարդակի է հասել քարոզարշավը, իրար ոտք ջարդել, ծեծել են խոստանում, իրար անպատվում ու հայհոյում են։ Առաջին հերթին պետք է կարողանանք սա վերացնել։ Երբ մենք պառակտված ենք եղել, երբ մեր երկրում ժողովուրդն իրար դեմ է պայքարել, ունեցել ենք սահմանների խախտում, տարածքների կորուստ ընդհուպ պետականության կորուստ։ ԼՀԿ-ն ամեն ինչ անելու է, որ համերաշխություն լինի և համատեղ ուժերով կարողանանք առաջ շարժվել։ Հակառակ դեպքում, եթե այս լարվածությունը շարունակվի, և ԼՀԿ-ն չունենա բավարար լծակ՝ զսպելու այս երկու կողմերի ատելության քարոզը, շատ հնարավոր է հունիսի 20-ից հետո ունենանք բախումներ, որովհետև ամեն կողմն իր ճիշտը համարում է բացարձակ և պատրաստ է մինչև վերջ գնալ դա ապացուցելու համար, ինչը վերածվելու է քաղաքացիների միջև բախումների»,-ասաց Գևորգ Գորգիսյանը։