Երեք տարի շարունակ ամեն ինչ արվեց, որ ջախջախվեն մեր ԶՈՒ-երը, կազմալուծվեն և հետագայում արվեցին քայլեր, որ ջախջախվի մեր դիվանագիտական կորպուսը։ Այս մասին հրավիրված ասուլիսին ասաց «Պատիվ ունեմ» դաշինքի նախընտրական շտաբի ղեկավար Դավիթ Հարությունյանը՝ անդրադառնալով ԱԳՆ նախարարի և փոխնախարարների հրաժարականի վերաբերյալ հարցին։
«Այսօր այդ մարտադաշտում ևս զինվոր չունենք։ Ինչպես զինվոր չունենք սահմանի վրա, որը կարողանա անառիկ պահել ՀՀ տարածքը, այնպես էլ այսօր զինվոր չունենք նաև մեր դիվանագիտական մարտադաշտում, որ նրանք ևս կարողանան պաշտպանել մեր երկիրը՝ դիվանագիտական ասպարեզում»,- նշեց Հարությունյանը։
Ինչ վերաբերում է Նիկոլ Փաշինյանի հայտարարությանը, թե նախկինում զինվորներին պատշաճ սնունդ չէր տրվում բանակում, կոնֆետները ճանկռելով էին ուտում, Հարությունյանը նշեց, որ իր համար դժվար է արձագանքել զառացանքների։
«Մի մարդ, որն ընդհանրապես հավանաբար չի հասկանում, թե ինչ է ԶՈՒ-երը, մի մարդ, որը կարծում է, որ ԶՈՒ հիմնական սկզբունքը ելակն է։ Ամենևին ասածս չի նշանակում, որ մեր զինվորները եղել են սոված, չի եղել նման բան, ուղղակի այդ մարդն ինքը երբևէ չծառայելով, հավանաբար չի պատկերացնում, թե ինչ են ԶՈՒ-երը։ Իհարկե, ԶՈՒ-երում ռեստորանային սնունդ չի մատակարարվում, բայց այն, ինչ ինքն ասում է, զառացանք անվանելուց բացի այլ ձևով չեմ կարող անվանել»,- նշեց Հարությունյանը՝ հավելելով, որ զառացանք է նաև այն հայտարարությունը, թե վերջին ժամանակահատվածում նրանեն հաջողվել է ապահովել ավելի շատ զենք, զինամթերք, որովհետև իրականում նա արել է հակառակը, մսխել է պաշտպանության բյուջեի միջոցներն՝ անիմաստ ձևով՝ քայքայելով մեր ԶՈՒ-երը։
Հարությունյանի խոսքով՝ այլ քայլեր ևս ձեռնարկվել են ԶՈՒ-երի քայքայման համար, արվել է քայլեր՝ քայքայելու ԶՈՒ-երն և ակնհայտ է, թե ինչու։ Հարությունյանն ընդգծեց, որ ԶՈՒ-երն այն կառույցն էր ՀՀ-ում, որոնք իր (Նիկոլ Փաշինյանի հեղ.) համար ևս վտանգ էին ներկայացնում և փորձել է չեզոքացնել իր համար վտանգը։
Այն աստիճան ստահոդ լուրեր են հրապարակ նետվել իշխանական թեկնածուի կողմից, որ դրան արձագանքնելու միակ եղանակը փաստերով խոսելն է։ Այս մասին ասաց «Պատիվ ունեմ» դաշինքի ընտրական շտաբի ղեկավար Դավիթ Հարությունյանը՝ պատասխանելով լրագրողների հարցերին։
«Փաստերով, կարծում եմ, կխոսենք շատ շուտով, երբ ժամը լրանա։ Իսկ ի՞նչ է անում Պատիվ ունեմ դաշինքը, որպեսզի հանրային լարվածությունն այս աստիճան չսրվի։ Մենք անում ենք ամեն ինչ, որ չսրվի, եթե ուշադիր լսեք մեր լիդերների հայտարարությունները, ապա երբեք չեք լսի բռնության կամ հաշվեհարդարի կոչեր։ Այսօր իշխանական ուժն է սփռում իր ատելությունը»,- հավելեց նա։
Հիշեցնենք, որ Նիկոլ Փաշինյանը մեղադրանքներ է հնչեցրել ՀՀ Երրորդ նախագահի հասցեին, թե զինվորներից գողացված գումարը պարտվել է «մոնտե կարլոներում»: Սերժ Սարգսյանն էլ արձագանքել է. «24 ժամ եմ տալիս. կամ պետք է մի փաստ ներկայացնի, կամ ես էնպիսի փաստեր եմ հրապարակելու իր մասին, իր ընտանիքի մասին, որ հասարակությունը թքելու ա իր վրա», – ասել էր Սերժ Սարգսյանը: