Այս ընտրություններով պետք է իրականացնենք մեր հեղափոխության երկրորդ փուլը, որը պետք է անվանենք ոչ բռնի, ժողովրդական, բայց այս անգամ ոչ թե թավշյա, այլ՝ պողպատյա հեղափոխություն: Այս մասին Տավուշում քարոզարշավի ժամանակ հայտարարեց Նիկոլ Փաշինյանը:
Նրա խոսքով՝ պողպատյա հեղափոխությունն իրենից ենթադրում է ոչ թե բռնություն, այլ՝ օրենք.
«Մենք այս ինստիտուցիոնալ ճանապարհով պետք է գնանք պետական ինստիտուտների ուժեղացման և պետական օրենքի կիրառման ինստիտուտների ուժեղացման ճանապարհով: Սա այսօր այլընտրանք չունի»:
Նրա իր խոսքում նշեց, որ Հայաստանում գոյություն է ունեցել, էլիտա, որն ինքն իրեն անընդհատ վերարտադրել է.
«Եթե ստեղծվել են աշխատատեղեր կամ պաշտոններ, դա միայն այդ էլիտայի ներկայացուցիչների համար է եղել: Այսօր դա ամենաշատը երևում է իրավաբանների վրա: ԵՊՀ-ի իրավաբանական ֆակուլտետում կլոնացված իրավաբանական համակարգ է ձևավորվել, որի 60%-ը պարզապես ատում է ժողովրդին: Նրանք չեն հասկանում՝ինչպե՞ս կարող է երկրում ժողովուրդը որոշիչ լինել, իրենք միայն էլիտայով են որոշում: Դրա համար էլ, երբ ասում ենք բուհական համակարգը բարեփոխենք, ասում են՝ ո՞նց, մեր սրբություն շենքերը։ Այո՛, այդ շենքերն իրենց համար սրբություն են, մեհյաններ են, որտեղ էլիտան քրմական համակարգով ինքն իրեն վերարտադրում է
Փաշինյանը վստահեցրեց, որ հիմա Հայաստանում իշխանությունը ժողովրդի ձեռքին է, և որևէ մեկը չի կարող ժողովրդի ձեռքից վերցնել իշխանությունը.
«Մենք կեղծ էլիտաներին թույլ չենք տալու վերարտադրվել։ Այո՛, եթե պետք լինի էլի հեղափոխություն, կանենք այնքան հեղափոխություն, մինչև էլիտաները՝ հոգևորից սկսած՝ քաղաքականով վերջացրած, խոնարհվեն ժողովրդի առաջ։ Դուք տեր չեք, դուք ծառա եք, դուք այլևս Հայաստանում չեք լինելու տեր, Հայաստանում լինելու է տեր ժողովուրդը, և դուք բոլորդ պիտի խոնարհ ծառայեք նրանց։ Նրանք ասում են, որ ժողովուրդը պետք է ապրի, շնչի, արտաշնչի իրենց թույլտվությամբ, ո՛չ այդ դուք պետք է ապրեք, շնչեք, արտաշնչեք միայն ժողովրդի թույլտվությամբ՝ սկսած հոգևոր էլիտայից, շարունակած իրավաբանական էլիտայով, վերջացրած քաղաքական էլիտայով։ Դուք չեք թպրտալու ժողովրդի առաջ, որովհետև ժողովրդի դեմը խաղ չկա։ Հայաստանում մեկնարկել և ծավալվել է ոչ բռնի, բայց պողպատյա ժողովրդական հեղափոխությունը, և կեղծ էլիտաները պետք է անցնեն ժողովրդի թրի տակով»,-հայտարարեց Փաշինյանը: