Հայաստանի նախկին նախագահ Ռոբերտ Քոչարյանը կարծում է՝ այն գործընթացները, որոնք երկիրը պարտության բերեցին ղարաբաղյան հակամարտությունում, հմտորեն ղեկավարվում էին դրսից: Այս մասին նա հայտարարել է Sputnik Արմենիային, RT-ին և «РИА Новости»-ին տված հարցազրույցում։ Նա հիշեցրել է, որ 2018 թվականին զանգվածային հարձակում էր սկսվել բանակի դեմ:
«Իսկ Հայաստանում բանակը միշտ համարվել է ամենահաջողված պետական ինստիտուտը, մարդիկ հպարտանում էին այս բանակով՝ որպես հաղթող բանակ, որպես մեր անվտանգության ողնաշար: Դա բնական է: Հարձակումը բանակի վրա, հարձակումը եկեղեցու վրա սկսվել էր անմիջապես: Եվ հարձակումը մեր հոգևոր արժեքների, մեր ինքնության վրա»,- հարցազրույցում հայտարարել է Քոչարյանը:
Ըստ նրա՝ յուրաքանչյուր հայ ինքնընկալման համար ունի որոշ սրբազան բաներ:
«Այստեղ այս ամենը շատ լուրջ կորոզիայի է ենթարկվել, բառացիորեն այս թիմի իշխանության գալու առաջին իսկ օրվանից: Ես կրկնում եմ. բանակը, եկեղեցին և մեր ազգային արժեքները: Հետևանքը պատերազմում պարտությունն է: Արդյոք այս ամենը փոխկապակցվա՞ծ է: Վստահ եմ, որ փոխկապակցված է»,-ասել է Քոչարյանը:
Քոչարյանի խոսքով՝ դա չի նշանակում, թե մարդիկ, որոնք նստած են սորոսյան գրասենյակում
կամ նման կազմակերպություններում, հատուկ ծրագրել էին պարտությունը Ղարաբաղում:
«Բայց ես կարծում եմ, որ պարզապես այս գործընթացի հեռակառավարման վահանակը բոլորովին այլ տեղում է: Իսկ այստեղ բավականին մեծ ոգևորությամբ կատարում էին յուրաքանչյուրն իր առաջադրանքը, գուցե չտեսնելով ընդհանուր պատկերը և ընդհանուր նպատակը: Սա շատ հմուտ կառավարում է, բայց ոչ տեղական: Աութսորսինգ է: Քանի որ այդ ամենը շատ սինքրոն էր տեղի ունենում և մեզ համար չափազանց ծանր հետևանքների է հանգեցրել»,-հայտարարել է նախկին նախագահը: