Ոստիկանությունը պահպանում է ոչ միայն Նիկոլ Փաշինյանի, այլև մյուս թեկնածուների անվտանգությունը,- հունիսի 16-ին տեղի ունեցած մամուլի ասուլիսի ժամանակ նշեց ՀՀ փոխոստիկանապետ Արա Ֆիդանյանը` արձագանքելով լրագրողի հարցին, թե ինչու է ոստիկանությունը հսկայական մեծ ուժերով ուղեկցում Փաշինյանին, ինչը վարչական ռեսուրսի կիրառում է։
«Ոստիկանությունը կատարում է իր ծառայությունը, իր աշխատանքը։ Յուրաքանչյուր դեպքով նախնական գնահատում է իրականացվում` հասարակական անվտանգության հետ կապված։ Ի դեպ, դուք նշեցիք կոնկրետ մեկ անձի հետ կապված, բայց մենք ստացել ենք այլ ուժերից ևս նման դիմումներ և պատշաճ ձևով իրականացնում ենք ուղեկցումն ու անվտանգությունը»,- ասել է փոխոստիկանապետը։
Թե թեկնածուին քանի ոստիկան ու քանի ավտոմեքենա է ուղեկցում, ըստ Ֆիդանյանի, որոշվում է անվտանգության գնահատման արդյունքում. «Եթե առկա են որոշակի խնդիրներ, կամ հասարակական անվտանգության հետ կապված հարցեր, ապա համապատասխան ուժերով իրականացվում է անվտանգության ապահովումը»: