ՀՅԴ Հայաստանի ԳՄ անդամ Արծվիկ Մինասյանն այսօր հրավիրված մամուլի ասուլիսին անդրադարձավ երեք հարցի՝ ԿԳՄՍ նախարար Արայիկ Հարությունյանի՝ երիտասարդների ընդվզմանը որակումներ տալուն, երիտասարդների ընդվզումը կուսակցականացնելուն և քրեական գործերի մասին նախարարի արած հայտարարությանը՝ նշելով, որ Արայիկ Հարությունյանը Քրեական օրենսգրքի առնվազն երկու հոդվածով ենթակա է պատասխանատվության:
«Արայիկ Հարությունյանը փորձեց երիտասարդների ազնիվ ընդվզմանը որակումներ տալ, այն դեպքում, երբ ոլորտում իրականացվող հիմնական քաղաքականության շահառուն հենց երիտասարդությունն է: Եվ երբ երիտասարդությունն իր ընդվզումն է արտահայտում, դա որակվում է ամենատարբեր բնորոշումներով, նշանակում է մարդը չի տիրապետում իրավիճակին, չի հասկանում թե որտեղ է գտնվում և ինչ գործառույթներ ունի»,- ասաց նա:
Արծվիկ Մինասյանն այնուհետև կարդաց կառավարության կառուցվածքի և գործունեության մասին օրենքից կոնկրետ հատված, որտեղ ասվում է, որ կրթության, գիտության, մշակույթի և սպորտի նախարարության գործառույթն է մշակել և իրականացնել լեզվի, ժողովրդի հոգևոր և մտավոր ներուժի ամրապնդման, երիտասարդների հոգևոր, մշակութային, ազգային ինքնության զարգացման, հայրենասիրական դաստիարակության, իրավագիտակցության մակարդակի բարձրացմանն ուղղված կառավարության քաղաքականությունը:
Սակայն, ըստ Մինասյանի, այն, ինչ նա արվում է, հակառակն է այս ամենին, և նախարարը գործում է նաև հակաօրինական ընթացքով: Մինասյանի խոսքով՝ երիտասարդների ընդվզումը փորձելով կուսակցականացել, Արայիկ Հարությունյանը շատ պարզ նպատակ է հետապնդում՝ թուլացնել պայքարը, որտեղ ոչ թե կուսակցականությունն է, այլ ազգային գիտակցությունն է:
«Պատահական չէ, որ այս ոլորտի կարևոր դերակատարները, մտավորականները, դասախոսները նույնպես իրենց բողոքի ձայնն են բարձրացնում այն մտահոգությունների վերաբերյալ, որ ԿԳՄՍՆ-ը և անձամբ նախարարի կողմից դրվում է շրջանառության մեջ: Սա վկայում է այն մասին, որ այս մարդը ոչ միայն չի տիրապետում իրավիճակին, այլ նաև կանխամտածված օտարածին օրակարգի սպասարկում է իրականացնում՝ մեր ժողովրդին կտրել ազգային ինքնությունից»,- նշեց նա:
Արծվիկ Մինասյանը շեշտեց, որ խելացի իշխանությունն այսպիսի ընդվզումը կընդուներ որպես կարևոր ազդակ, սակայն կարող ենք արձանագրել, որ այս իշխանությունը խելացի էլ չէ:
«Մյուս կարևոր խնդիրը վերաբերում է Արայիկ Հարությունյանի արտահայտած մի մտքին, որն առաջին անգամ չէ, որ հնչում է. ինչ-որ սպառնալիքներ է տեղում քրեական գործերի մասին, արկղերը դրանցով լցնելու մասին: Ես հիմա հրապարակային հայտարարում եմ՝ Արայիկ Հարությունյանը Քրեական օրենսգրքով ենթակա է պատասխանատվության, թող հոդվածն ինքը որոշի, բայց առնվազն երկու հոդված այստեղ կա. կամ սուտ մատնության հոդվածն է, կամ հանցագործություն է պարտակում: Հակառակ դեպքում՝ Հարությունյանի արտահայտած այս սպառնալիքները ունեն մեկ կարևոր նպատակ՝ քաղաքական շանտաժի միջոցով փորձել իբր իրավական մեղադրանքների տարափ տեղալ»,- ասաց նա:
Նախկին նախարարը նշեց, որ այս ամենը ցույց է տալիս, որ գործ ունենք անպատասխանատու մի անձնավորության հետ, որը, ցավոք, Հայաստանի իշխանության վարկաբեկման, հեղինակազրկման գործընթաց է սկսել:
«Այսօր շատ հստակ է արձանագրել, որ երիտասարդների ընդվզումը, բողոքը՝ ուղղված այդ փոփոխություններին, աջակցություն է ստանալու Հայաստանի բոլոր բնակավայրերում և հասարակության բոլոր շերտերում, որովհետև մեր ազգային ինքնագիտակցությունը, նկարագիրը երբեք և որևէ արայիկհարությունյաններ, օտարածին օրակարգեր սպասարկելու պատրաստ անձինք չեն կարող վնաս հասցնել»,- եզրափակեց նա: