Այսօր անհետ կորած զինվորների և ռազմագերիների ծնողները հերթական ակցիա են իրականացնում Կառավարության դիմաց՝ իրենց որդիներին գտնելու և Հայաստան վերադարձնելու պահանջով:
Կառավարության դիմաց էր նաև Արցախի նախկին պաշտոնյա Բորիս Ավագյանը:
Նա նշեց, որ ծնողները պահանջում են ստեղծել հանձնաժողով, որտեղ ներկայացված կլինեն ԱԱԾ-ի, Կառավարության, ՊՆ-ի և ծնողների ներկայացուցիչները.
««Պետք է ստեղծել հանձնաժողով, որը լիակատար կաշխատի և ամեն մի հարցին կմոտենա անհատական: Կան ծնողներ, որոնք գրում են ինձ ու հարցնում ՝ բա մեր երեխան դատվում է ու վե՞րջ, էլ չի գալո՞ւ, պետք տրամադրվի իրավաբանական խորհրդատվություն, պետք է մարդիկ հասկանան, որ այդ բեմադրված դատավարությունը, որը տեղի է ունենում, շուո է միջազգային հասարակության համար:Բոլորն էլ հասկանում են, եթե քեզ մոտ գերվարված անձ կա, ցանկացած ցուցմունք, որը քեզ անհրաժեշտ է, կարող ես ստանալ »,- ասաց Բորիս Ավագյանը:
Նրա խոսքով՝ հայ փաստաբանների ներգրավվումը հայ ռազմագերիների դատավարությանը կլինի ոչ էֆեկտիվ, քանի որ նրանք կլինեն ճնշման տակ, անհրաժեշտություն կա ներգրավվելու միջագային փաստաբանների.
«Պետք է լինեն միջազգային փաստաբաններ, որոնց վրա Բաքվում ճնշում չի գործադրվի: Մենք հասկանում ենք, որ ցանկացած հայ փաստաբանի, որը կգնա Բաքու, լինելու է ճնշման տակ և չեմ հավատում, որ նրանց անվտանգությունը Բաքուն կարող է ապահովել»,-ասաց Ավագյանը:
Անդրադառնալով ԱԱԽ քարտուղար Արմեն Գրիգորյանի հայտարարությանը, թե նախկին ԱԳ նախարար Արա Այվազյանը խոչընդոտել է գերիների գործընթացին, Բորիս Ավագյանը նշեց. «Եթե նա ունեցել է բավարար հիմքեր՝ այդպիսի հայտարարություն անելու համար, ես չեմ հասկանում, մինչև այսօր ինչու՞ քրեական գործ չի հարուցվել, և ինչու՞ չի քննվում այդ փաստը: Եթե խոչընդոտ է առաջացրել Արա Այվազյանը, ապա նա հանցանք է գործել և պետք է խստագույն կերպով պատասխան տա օրենքի առաջ, իսկ եթե այդպես չէ, ստացվում է, որ Արմեն Գրիգորյանն է ստում: Սա պարզելու համար Գլխավոր դատախազն Արմեն Գրիգորյանի հայտարարությունը պետք է ընդունի որպես հայտարարություն՝քրեական գործ հարուցելու մասին: Այդ գործի վերաբերյալ պետք է հարուցվի քրգործ և քննվի այն»: