Ադրբեջանը ոչ միայն շարունակում է կոպտորեն ոտնահարել միջազգային մարդասիրական իրավունքի նորմերը, այլև՝ հակադրվում է։ Այս մասին հրավիրված մամուլի ասուլիսին ասաց իրավապաշտպան, ՀՀ առաջին ՄԻՊ Լարիսա Ալավերդյանը։
«Հատկանշական է, որ այդ դեպքում միջազգային հանրությունը մինչև անգամ ողջունում է, այսինքն՝ այստեղ կա այնպիսի կծիկ՝ քաղաքական և այլ պայմանավորվածությունների, շահերը, որը Նիկոլ Փաշինյանի թիմը դարձնում է երանելի թիմ թե՛ Ալիևի, թե՛ Եվրոպայի համար, մինչև անգամ երանելի է այն խավի համար Հայաստանում, որոնք ունեն պրոթուրքական կողմնորոշում»,- նշեց Ալավերդյանը՝ հավելելով, որ հասարակագետները պետք է ուսումնասիրություն անցկացնեն՝ պարզելու, թե որքանով է հայ հասարակությունը փոխվել 1988թ-ից հետո։
Նրա փոխանցմամբ՝ խորհրդային տարիներին մեծացած սերունդը բարձրացրել է Արցախյան շարժում, հետագայում հաղթել է Արցախյան պատերազմը՝ ազատագրելով Ադրբեջանին իրավական առումով չպատկանող այն բոլոր տարածքները, որոնք կոչվում են «Յոթ շրջան»։ Ալավերդյանի դիտարկմամբ՝ չկա որևէ փաստաթուղթ, որտեղ նշված է, որ բոլորս պարտավոր ենք ճանաչել խորհրդային սահմանները, քանի որ իրավական առումով այդ շրջանները չեն պատկանում Ադրբեջանին, դրանք նվիրվել են խորհրդային տարիներին՝ քաղաքական ինչ-ինչ պատճառներով, մինչդեռ միջազգային հանրության՝ արևմուտքի կողմից ավելինն է արվել 1991թ-ին, որովհետև, թեև չկար որևէ գրավոր փաստաթուղթ, բայց իրենք կարողացել են համոզել այն ժամանակվա ազգային էլիտային՝ ՀՀՇ-ին, որ դա պետք է այդպես արվի։ «Իրենք իրենց պաշտպանել են փաստաթղթով, որտեղ նշված է, որ մեր այդ ճանաչումը չի կանխորոշում սահմանային հարցը։ Այսինքն՝ լինելով աշխարհաքաղաքական խաղերի հմուտ խաղացողներ, իրենք իրենց իմիջը պաշտպանել են։ Արի ու տես, որ Հայաստանի առաջին քաղաքական էլիտան ժամ առաջ փորձել և իրականացրել է Արցախի «բեռից» ազատվելու քայլը, իսկ այն, ինչ հիմա տեսնում ենք, դրա շարունակությունն է»,- նշեց Ալավերդյանը՝ հավելելով, որ այդ քաղաքականությունը միջազգային խաղացողների սրտով էր։
Ինչ վերաբերում է հայտարարություններին, թե տարիներ շարունակ ապրել ենք ադրբեջանցիների հետ, Ալավերդյանը նշեց, որ, իհարկե, ապրել են, բայց դրանից հետո եղել է Բաքվի, Սումգայիթի, Գանձակի և այլ 32-ից ավել բնակավայրերում հայերի կոտորածները. «Ես չեմ հասկանում՝ այս 30 տարիների ընթացքում կես միլիոն հայերի ցավը ոչի՞նչ էր ձեզ համար»։