Մենք ունենք պաշտոնյաներ, որոնք իրենց հայտարարություններով պարզապես նվերներ են մատուցում ադրբեջանական իշխանություններին խախտումները ցույց տալու հարցում։ Այս մասին ասուլիսի ժամանակ հայտարարեց ՄԻՊ Արման Թաթոյանը և որպես օրինակ հիշեցրեց, որ հուլիսի 5-ին, երբ Գեղարքունիքում տեղի էր ունեցել փոխհրաձգություն, լրատվամիջոցներից մեկը, ըստ նրա ուղղորդված, հարց է տվել Վերին Շորժայի վարչական շրջանի ղեկավարին՝ թե ադրբեջանցիները խոչընդոտու՞մ են գյուղացիների բնականոն կյանքը, իսկ վարչական շրջանի ղեկավարը պատասխանել է՝ չէ, ինչ խոչընդոտել, գյուղացիները նույնիսկ այդ կողմը չեն էլ գնում.
«Ո՞նց է վարչական շրջանի ղեկավարն այդպիսի բան ասում, երբ ինքս եմ այդ կողմում եղել, և ադրբեջանական զինծառայողները նստած են հենց այն վայրերում, որտեղ մեր արոտավայրերն են, իսկ բնակիչները չեն կարողանում օգտվել այդ արոտավայրերից։ Հիմա այսքանից հետո ես որքան էլ գնամ, միջազգային ատյաններում ասեմ, թե ադրբեջանական զինծառայողները խախտում են մեր իրավունքները, այս մարդու հայտարարությունները կդնեն ու կասեն, թե այս ինչ եք խոսում, նայեք ձեր գյուղապետերն ինչ են ասում, ձեր գյուղացիները խնդիր չունեն»,-ասաց ՄԻՊ-ը և ընդգծեց, որ երկրի ներսում լինի կազմակերպված քաղաքականություն, որպեսզի այս հարցում հաջողություններ ունենանք։