Կոռեկտ խոսեք մեր հյուրերի մասին. Անվճար պատվաստումը օտարերկրացիների համար կրում է մարդասիրական նպատակ. Ավանեսյանը` իրանցիների հերթերի մասին

Առողջապահության նախարարի պաշտոնակատար Անահիտ Ավանեսյանն այսօր լրագրողների հետ զրույցում անդրադարձել է մայրաքաղաքում գոյացած օտարերկրացիների հերթերին, որոնք ցանկություն ունեն պատվաստվելու։ Ավանեսյանը նշեց, որ պետք է ճկուն կերպով կազմակերպել մնացորդները, որպեսզի մեր քաղաքացիները որևէ պահի չունենան պատվաստանյութերի պակաս։

Դիտարկմանը, որ Հայաստանը ձեռք է բերում պատվաստանյութեր պետբյուջեի հաշվին և այդ գումարներով ՀՀ-ում պատվաստվում են օտարերկրացիները՝ անվճար հիմուքններով, իսկ ՀՀ քաղաքացիների համար արտերկրում պատվաստանյութերը վճարովի են, Ավանեսյանը նշեց, որ սա մարդասիրական նպատակ ունի։

«Մեր նպատակն է՝ և՚ քովիդի բուժման ժամանակ և, դրանից հետո պատվաստումը հասանելի դարձնել Հայաստանում գտնվող օտարերկրացիների համար, կրել է մարդասիրական և զուտ հակահամաճարակային հստակ նպատակ։ Քովիդը չի ճանաչում ոչ քաղաքացիություն, ոչ կարգավիճակ, ոչ տարիք։ Պետությունը հնարավորինս պետք է անի՝ վարակի տարածումը կանխելու համար»։

Առողջապահության նախարարի պաշտոնակատարը նշել է նաև, որ բժշկական տուրիզմն են այսպես զարգացնում։ Դիտարկմանը՝ որ քաղաքի ամենակենտրոնական հատվածը վերածվել է «անօթևանների բնակատեղիի», որտեղ գիշերում են իրանցիները՝ պատվաստվելու համար հերթեր են գոյացել, Ավանեսյանը նշեց, որ պետք է կոռեկտ լինել երկիր ժամանած հյուրերի նկատմամբ։

«Ուզում ենք անել ամեն ինչ, որ այդ ծառայությունները ստանալիս որևէ կուտակումներ, հերթի հետ կապված խնդիրներ չառաջանան, դրա համար էլ կազմակերպում ենք, որ լինեն հերթագրման մեքենաներ»։

Այսօրվանից ուժի մեջ է մտնում օտարերկիրացիների՝ ՀՀ-ում 10 օր լինելու պայմանը։ Ըստ Ավանեսյանի՝ այս պամանների փոփոխությունը կապված է մեր պատվաստանյութի քանակների մնացորդների տեղաշարժով և նոր ակնկալվող խմբաքանակների ինֆորմացիայով։

«Որ պահին մենք կունենանք նոր մատակարարումներ, կարող ենք նաև վերանայել այս պայմանները»։

Ավանեսյանը նշեց, որ պատվաստվածների թիվը ՀՀ-ում 111 հազարից ավել է, սակայն չնշեց, թե դրանցց քանիսն են օտարերկրացիների պատվաստման դեպքերը։

Ավանասյանը նշեց, որ տեսնելով, որ նման հետաքրքրություն է առաջացել՝ կառավարությունը նժարների վրա պետք է դնի երկու պայման՝ արդյոք մի փոքր վճար է պետք նշել պատվաստման դիմաց և այն, որ քաղաքացիները գալիս են Հայաստան, գումարիներ ծախսում Հայատանում և բարձրացնում վարկանիշը։ Ավանեսյանը կարծում է, որ խելամիտ որոշում կկայացվի այն ժամանակ, երբ հոսքերն անկառավարելի դառնան։