Քաղաքացիներն ավտոմեքենայի համարանիշների կորստի դեպքում համապատասխան պետտուրքի վճարման պարագայում կկարողանան ձեռք բերել համարանիշի կրկնօրինակը։ Համապատասխան որոշման նախագիծը հավանության արժանացավ կառավարության այսօրվա նիստում։
ՀՀ ոստիկանապետ Վահե Ղազարյանն ասաց, որ նախագծով առաջարկվում է փոփոխություններ և լրացումներ իրականացնել տրանսպորտային միջոցների համարանիշների հաշվառման և հատկացման կարգում։
Ոստիկանապետը մանրամասնեց՝ գործող կարգի համաձայն տրանսպորտային միջոցի զույգ համարանիշների կորստի կամ գողության դեպքում օգտագործողը զրկվում է դրանց կրկնօրինակը ստանալու հնարավորությունից։ Վահե Ղազարյանը նշեց, որ այս իրավակարգավորմանը նպաստել է հատկապես մեծ պահանջարկ ունեցող գողացված համարանիշների դիմաց գումար շոթելու դեպքերի աճը։
«Առաջարկվող նախագծով զույգ համարանիշների կորստի դեպքում օգտագործողին իր ցանկությամբ 12 000 դրամ պետտուրքի վճարի դիմաց կհատկացվի նոր համարանիշների կրկնօրինակը։ Որոշումն ուժի մեջ է մտնելու պաշտոնական հրապարակումից 3 ամիս հետո, և տարածվելու է 2020 թվականի հունվարի 1-ից ծագած հարաբերությունների վրա»,-նշեց ոստիկանապետը։
ՀՀ վարչապետի պաշտոնակատար Նիկոլ Փաշինյանն էլ նկատեց՝ այս պարագայում քաղաքացին ոչ թե ստիպված կլինի համարանիշի դիմաց մեծ փրկագին վճարել, այլ ուղղակի պետտուրք վճարելով ստանալ համարանիշի կրկնօրինակը. «Սա կարևոր որոշում է այդ խնդիրն արմատապես լուծելու համար»,-ասաց Նիկոլ Փաշինյանը։