«Վերջնաժամկետ չի կարող լինել, մինչև իրացման աշխատանքները չլինեն, եթե Պողոսն իր տնից դուրս չի գալիս, տարածքը, հողերը ազատ չեն, նախագիծը չի կարող ավարտին հասցվել»,-այս մասին այսօր «Տեսակետ» մամուլի ակումբում հրավիրված ասուլիսի ժամանակ ասաց «Հին Երևան» նախագծի հեղինակ, ՀՀ վաստակավոր ճարտարապետ Լևոն Վարդանյանը՝ խոսելով նախագծի ավարտին հասցվելու ժամկետների մասին:
Նա նշեց, որ այլևս որևէ այլ շենք ապամոնտաժելու մասին խոսք չկա, և ասաց, որ ցայսօր ապամոնտաժվածները եղել են նախագծի շրջանակներից դուրս, իսկ բուն նախագծի համար ապամոնտաժվել է միայն Աֆրիկյանների շենքը: Մնացածները, ըստ բանախոսի, ոչ թե ապամոնտաժել են, այլ քանդել, իսկ Աֆրիկյանների շենքի ապամոնտաժումը եղել է իր վերահսկողության ներքո:
Նա նշեց, որ իրականությանը չեն համապատասխանում այն լուրերը, թե քարերը սխալ են համարակալված կամ կորել են: Վարդանյանը վստահեցրեց, որ ապամոնտաժումն անձամբ ինքը հսկել է, իսկ թե դրանից հետո որևէ մեկը ինչ-որ քար պահվող վայրից գողացել է, թե ոչ, ինքը չի կարող ասել:
Ճարտարապետն ասաց, որ այսօր նախագծի իրականացման համար հարկավոր է առաջ բերել Արամի 23 շենքի ճակատային հատվածը: Համենայն դեպս, իր նախագծով այդպես է նախատեսվում, սակայն այդ հարցի շուրջ էլ աղմուկ կա՝ կապված Տիգրան Հեքեքյանի և «Փոքրիկ երգիչների» ՝ այնտեղ աշխատելու հետ, և այդ առումով էլ հարցը մինչ օրս լուծված չէ:
- Լրահոս
- Թրենդային