Դեռևս այս տարվա մայիսին ՀՀ Գլխավոր դատախազությունը հաղորդագրություն էր տարածել՝ տեղեկացնելով «ՁորաՀԷԿ» հիդրոէլեկտրակայանի գույքի օտարման դեպքի առթիվ հարուցվել է քրեական գործ ՀՀ Քր. Օրենսգրքի 308 հոդվածի 2-րդ մասի հատկանիշներով՝ «պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ»: Նույն հաղորդագրության համաձայն, նախապատրաստված նյութերում առկա են պաշտոնական անձանց ներգրավված լինելու մասին տվյալներ և այդ հիմքով էլ նախաքննությունը հանձնարարվել է ՀՔԾ-ին:
Ավելի ուշ սեպտեմբերին վարչապետ Նիկոլ Փաշինյանի հայտնի ասուլիսից հետո պարզվեց, որ այս քրեական գործն առնչություն ունի Վատիկանում ՀՀ նախկին արտակարգ և լիազոր դեսպան, ՀՀ նախկին նախագահ Սերժ Սարգսյանի փեսա Միքայել Մինասյանի հետ։ Փաշինյանը հայտարարել էր, որ Միքայել Մինասյանը «ստրատեգիական նշանակության օբյեկտ» է սեփականաշնորհել պետության շահերին հակառակ։
«Ես հիմա չեմ ուզում այնպիսի հայտարարություն անել, որը նախաքննության առումով զուտ խնդիրներ կառաջացնի, բայց Միքայել Մինասյանը Հայաստանի շատ օբյեկտների սեփականատեր է եղել և մինչև օրս շարունակում է մնալ, ուրիշ բան, որ այդ սեփականությունը գրանցված է եղել մի կնոջ անունով, որի անունը ոչ մեկի ոչ մի բան չի ասում։ Իզուր են նաև իրենք ձև անում, թե իրենք տեղյակ չեն, թե ինչի մասին է խոսքը», – ասել էր վարչապետը։
Մայիսին հարուցված քրեական գործից անցել է կես տարի, սակայն ՀՔԾ-ն շարունակում է լռել նախաքննության ձախողումների կամ ձեռքբերումների մասին։
PrimeNews.am-ը օրերս հարցում էր ուղարկել ՀՔԾ փորձելով հասկանալ ի՞նչ արդյունքներ է գրանցել նախաքննությունը, ո՞ր փուլում է այն և ովքե՞ր են անցնում այս քրեական գործով, կա՞ն արդյոք մեղադրյալներ: Նաև ուղիղ հարց էինք տվել ՀՔԾ-ին. «Այս քրեական գործի հետ կապված վարչապետ Նիկոլ Փաշինյանն իր մամլո ասուլիսում հայտարարեց, որ դրան առնչություն ունի Վատիկանում Հայաստանի նախկին դեսպան Միքայել Մինասյանը: Խնդրում եմ տեղեկացնել ի՞նչ կարգավիճակ ունի Մինասյանն այս քրեական գործով, արդյոք կանչվե՞լ է հարցաքննության»:
Սակայն ՀՔԾ-ից ստացել ենք անատամ մի պատասխան, որն ըստ էության նախաքննության ձախողումների մասին է խոսում։
«Ի պատասխան 04.11.2019թ.-ին ուղարկված Ձեր հարցմանը` հայտնում ենք, որ
նշված քրեական գործով նախաքննությունը շարունակվում է: Քրեական գործի
վերաբերյալ այլ տեղեկատվություն դեռևս չենք կարող տրամադրել` նախաքննության
շահերից և ՀՀ քրեական դատավարության օրենսգրքի 201-րդ հոդվածով նախատեսված`
նախնական քննության տվյալների հրապարակման անթույլատրելիությունից ելնելով», -ասված է ՀՔԾ-ից ստացված պատասխանում: