«Մեր միակ մեղավորությունը այն է, որ մենք չենք զոհվել, եղել ենք ամենաթեժ կետերում։ Արել ենք ամեն ինչ մինչև վերջին օրը»,- «Պատիվ ունեմ» դաշինքի պատգամավորության թեկնածու, ԱԱԾ նախկին պետ Արթուր Վանեցյանը հանրային հեռուստաընկերությանը տված հարցազրույցում անդրադրձել է նույն հեռուստաընկերության եթերում ՀՀ պաշտպանության նախարարի նախկին տեղակալ Գագիկ Մելքոնյանի մեղադրանքներին, թե Վանեցանը պատերազմի օրերին լքել է մարտի դաշտը։
«Փախե՞լ է արդյոք Արթուր Վանեցանը և «Հայրենիք» զորախումբը արցախյան պատերազմի դաշտից, թե ոչ։ Դա իրականության հետ որևէ աղերս չունի»,- ասել է Վանեցյանը։
Հարցին՝ հանդիպելու են արդյո՞ք ԱԺ-ում, քանի որ վերջինս ՔՊ ցուցակով պատգամավորի թեկնածու է, Վանեցանը նշեց, որ նախկինում էլ են հանդիպել Մելքոնյանի հետ։ Առաջարկեց նախ ստուգել Մելքոնյանի ապօրինի ունեցվածքները.
«Էսօր որ իրեն սրբի տեղ է դրել, խոսում է արդարությունից, ազնվությունից։ Հայաստանի ԶՈՒ-ի ամենամեծ թալանն իրականացնողի համբավ ունի։ Մարդ, որն ունի բազմաթիվ հանքեր, Անապայում հյուրանոց ունի, ունի ռեստորաններ, դղյակներ՝ ըստ շրջանառվող լուրերի։ Թող մի հատ ստուգեն, ապօրինի հարստացման մասին սկսել են շատ խոսել՝ թող մի հատ ստուգեն, տեսնեն ունի, թե չունի»։
Հանրայինի եթերում Գագիկ Մելքոնանը նաև հետաքրքրվել էր, թե ո՞ր բնագծում են եղել Վանեցյանն ու զորախումբը։ «Պատիվ ունեմ» դաշինքի պատգամավորության թեկնածուն պատասխանել է՝ Արցախի ՊԲ հրամանատարի ուղիղ ենթակայության ներքո են եղել՝ ուղարկել են իրենց ամենադժվար վայրերը՝ որպես հատուկ ջոկատ։ Նոյեմբերի հինգին էլ ԱՀ նախագահի խնդրանքով մեկնել են Շոշ գյուղ։
«Մենք գնացել ու միչև վերջին վայրկյանը մնացել ենք գյուղում՝ մեր դիրքերում։ Մինչև էսօր այդ դիրքերը և գյուղը հայկական վերահսկողության ներքո է գտնվում, իսկ որտեղ է եղել էդ Գագիկ Մելքոնյանը, ո՞ր դիրքերն է պահել պատերազմի ժամանակ։ Իմ ունեցած տեղեկություններով Քելբաջարում է եղել, հիմա որտեղ է Քելբաջարը, ո՞ւմ վերահսկողության ներքո։ Մենք ենք փախե՞լ, մենք ենք հանձնե՞լ, թե ինքը»։
Արթուր Վանեցյանը պատրաստվում է զրպարտության դիմաց բարոյական վնասի փոխհատուցում պահանջել ՀՀ պաշտպանության նախարարի նախկին տեղակալ Գագիկ Մելքոնյանից։ Վանեցյանը նշեց, որ դատական հայց է ներկայացվել ու համոզված է, որ դատարանում հաղթելու են և Մելքոնյանը պետք է հանրայինի եթերում հերքի իր խոսքերը։
«Փախուստի հարցը հերքվել է գլխավոր դատախազության, ԳՇ, ԱՀ ՊԲ, ՀՔԾ, ՔԿ, ԱԱԾ-ի ու տարբեր գեներալների կողմից, հերիք է, ամոթ է այդ թեման արծարծելը»,- ասել է Վանեցյանը։