ՍԴ-ն ուժի մեջ թողեց ԿԸՀ-ի՝ արտահերթ խորհրդարանական ընտրությունների արդյունքներն ամփոփելու մասին որոշումը։ Այսպիսով ևս մեկ անգամ արձանագրվեց, որ Հայաստանում արտահերթ ընտրություններն անցել են ժողովրդավարության չափանիշներին համապատասխան և ընտրությունների վերջնարդյունքն արտահայտում է ՀՀ ժողովրդի կամքը։ Կառավարության այսօրվա նիստի մեկնարկին ասաց ՀՀ վարչապետի պաշտոնակատար Նիկոլ Փաշինյանը։
Նիկոլ Փաշինյանն անդրադարձավ նաև միջազգային դիտորդական առաքելությունների գնահատականներին, որոնց համաձայն՝ արտահերթ խորհրդարանական ընտրությունները եղել են մրցակցային, հիմնական իրավունքներն ու ազատությունները հարգվել են, ընտրությունները եղել են ազատ և համապատասխանել են ժողովրդավարության սկզբունքներին։
«Մեզ բոլորիս շնորհավորում եմ ճգնաժամային պայմաններում ազատ և մրցակցային խորհրդարանական ընտրությունների անցկացման կապակցությամբ։ Շնորհավորում եմ «Հայաստան» և «Պատիվ ունեմ» դաշինքներին՝ խորհրդարան անցնելու առիթով։ Հայաստանի պատմության մեջ առաջին անգամ ընտրությունները դարձել են ներքաղաքական ճգնաժամի հաղթահարման միջոց մինչդեռ նախկինում սովոր ենք եղել ընտրությունների արդյունքներով ներքաղաքական ճգնաժամեր ունենալու պրակտիկային»,-ասաց Նիկոլ Փաշինյանը։
Վերջինս նկատեց՝ ՍԴ-ն իր որոշման մեջ մի շարք կարևոր շեշտադրումներ է արել, որոնցից մեկը վերաբերում է ատելության խոսքին։ Նիկոլ Փաշինյանը մեջբերեց ՍԴ-ի որոշումից հատված. «ՍԴ-ն, հաշվի առնելով վարչապետի սահմանադրական կարգավիճակը և լիազորությունների ծավալը, Հայաստանի սահմանադրական ժողովրդավարության պայմաններում, ինչպես նաև քաղաքական մեծամասնության ունեցած ազդեցությունը հանրային իշխանության մարմինների համակարգում ընդգծում է նրանց կողմից գործուն միջոցներ ձեռնարկելու անհրաժեշտությունը, հայաստանյան քաղաքական խոսքում ատելության, բռնության, վիրավորանքի և արժանապատվությունը նվաստացնելու կասկած հարուցող խոսքի և վարքագծի որևէ դրսևորում, ներառյալ նախընտրական քարոզչության ժամանակ հնչեցվող խոսքում բացառելու նպատակով։ Ընտրություններին մասնակցող քաղաքական ուժերի կողմից իրականացվող նախընտրական քարոզչությունն ուղղված է ընտրողների վստահությունը ձեռք բերելուն, ամրապնդելուն»,-ընթերցեց Նիկոլ Փաշինյանը։