Մեր տարածաշրջանում ռազմաքաղաքական իրավիճակը շարունակում է լարված մնալ։ Ադրբեջանի սադրիչ քայլերը նորանոր սպառնալիքներ են ստեղծում մեր տարածաշրջանի համար։ Կառավարության այսօրվա նիստում ասաց ՀՀ վարչապետի պաշտոնակատար Նիկոլ Փաշինյանը։
Նա ընդգծեց առանցքային դերը, որն ունի ՌԴ-ն մեր տարածաշրջանում կայունությունն ու անվտանգությունն ապահովելու գործում։
«ՀՀ և ՌԴ զինված ուժերի միացյալ խմբավորումը և ԼՂ-ում ռուսական խաղաղապահ առաքելությունն անկյունաքարային նշանակություն ունեն տարածաշրջանում խաղաղության և կայունության ապահովման գործում։ Միևնույն ժամանակ Ադրբեջանը նպատակ ունի խափանել նոյեմբերի 9-ի և հունվարի 11-ի եռակողմ հայտարարությունների իրագործումը, մասնավորապես տարածաշրջանային կոմունիկացիաների բացման և Հայաստանի ապաշրջափակման մասով»,-նշեց վարչապետի պաշտոնակատարը։
Նիկոլ Փաշինյանը նշեց, որ ակնկալում են՝ Ադրբեջանն օր առաջ կկատարի գերիներին, պատանդներին և պահվող այլ անձանց վերադարձնելու իր ստանձնած գրավոր պարտավորությունը։ Նա վերահաստատեց խաղաղ բանակցությունները վերսկսելու պատրաստակամությունը։