ԼՂ Մարտակերտ քաղաքի շրջանային հիվանդանոցում կազմակերպված բժշկական ակցիայի շրջանակում մարդասիրական արձագանքման կենտրոնի սպաներն ու ռուսական խաղաղապահ զորախմբի հատուկ նշանակության բժշկական ջոկատի ռազմական բժիշկներն առաջին անգամ ծնունդ են ընդունել։ Հայտնում է ՌԴ ՊՆ-ն։
«Տղա է ծնվել։ Մայրը անմիջապես վերակենդանացման բաժանմունքում Հովհաննես է անվանել։ Տղան 4 կգ 250 գրամ է, հասակը՝ 49 սմ է», – պատմել է ռուսական խաղաղապահ զորակազմի հատուկ նշանակության բժշկական ջոկատի բժիշկ-անեսթեզիոլոգ Անատոլի Ախապկինը։
Ռազմական գերատեսչության հաղորդագրությունում նշվում է, որ հղի կինը որովայնի ցավերի պատճառով դիմել էր շրջանային հիվանդանոց: Աշխատակազմը, իմանալով, որ հիվանդանոցում ու քաղաքում համապատասխան մասնագետ չկա, որոշել էր օգնության դիմել ռուս ռազմական բժիշկներին: Հատուկ նշանակության ջոկատի բժիշկները ցուցաբերել են որակյալ օգնություն, փրկել են կնոջը և երեխային:
Հատուկ նշանակության ջոկատի բժիշկները բուժօգնություն են ցուցաբերել նաև Մարտակերտի շրջանի հեռավոր բնակավայրերի 52 բնակչի:
Մարդասիրական արձագանքման կենտրոնի աշխատակիցներն ակցիա են անցկացրել՝ բաժանելով պարենային փաթեթներ, առաջին անհրաժեշտության իրեր, տաք հագուստ և մանկական խաղալիքներ բազմազավակ ընտանիքներին, ներքին տեղահանված անձանց և կարիքավոր տեղի բնակիչներին: