Գիշերը Ադրբեջանի կողմից օկուպացված Քարվաճառի սահմանին լարված է եղել։ Անկանոն կրակոցներ են հնչել Սոթքի հանքի տարածքում։ Լարված իրավիճակի պատճառով էլ հանքավայրի մոտ 150 աշխատակից, ղեկավարության որոշմամբ, լքել է հանքի տարածքը։ «Գեոպրոմայնինգ Գոլդ» ընկերությունից «Փաստինֆո»-ին հաստատեցին լուրը՝ մեկնաբանելով, որ ստիպված են եղել դադարեցնել հանքավայրի աշխատանքը։
«Ստեղծված լարված իրավիճակի պատճառով, ընկերության ղեկավարությունը որոշում է կայացրել ժամանակավորապես դադարեցնել հանքավայրի գործունեությունը, աշխատակիցների անվտանգությունն ապահովելու համար՝ տարհանել»։
«Գեոպրոմայնինգ Գոլդ» ընկերությունից տեղեկացրեցին, որ տարհանումը իրականացվել է կեսգիշերից երեք ժամ անց, աշխատակիցներից որևէ մեկը չի տուժել։ Ընկերության աշխատանքն այսօր վերսկսվել է։
Հավելենք, որ ՀՀ ՊՆ-ից հաստատել են, որ հուլիսի 26-ին, ժամը 03:00-ի սահմաններում, ադրբեջանական ԶՈՒ ստորաբաժանումները, տարբեր տրամաչափի հրաձգային զինատեսակներից կրակ են բացել հայ-ադրբեջանական սահմանի Գեղարքունիքի հատվածում տեղակայված հայկական դիրքերի ուղղությամբ։