Գեղարքունիքի մարզի գրեթե բոլոր հատվածներում սահմանային կրակոցները դարձել են ամենօրյա, կրկնվող իրադարձություն: «Փաստինֆո»-ի հետ զրույցում ասաց «Պատիվ ունեմ» դաշինքի անդամ, պատգամավոր Թագուհի Թովմասյանը։
Նրա փոխանցմամբ՝ սահմանամերձ դարձած բնակավայրերի բնակիչները մշտապես ապրում և աշխատում են լարված իրավիճակում, իշխանությունները պետք է վերջ դնեն այս խնդրին.
«Կարծես թե և՛ բնակիչները, և՛ սահմանին մոտ գտնվող տարբեր ձեռնարկությունների աշխատակիցները կամաց-կամաց սովորում են այդ ապրելակերպին, փորձում են հաղթահարել վախը, իրենց համար հնարավորինս անվտանգ միջավայր ձևավորել, բայց գործ ունենք մարդկային գործոնի հետ: Մարդիկ չեն կարող անընդհատ ապրել կամ աշխատել լարված իրավիճակում, դա լինելու բան չէ, պետք է վերջ դրվի այսօրվա իրավիճակին»,-ասաց Թագուհի Թովմասյանը:
Վերջինս ընդգծեց, որ ստեղծված իրավիճակում սահմանամեձ դարձած բնակավայրերի հայաթափման իրական վտանգ է տեսնում.
«Հայաստանի բարձրագույն իշխանությունները լրջագույն մտածելու խնդիր ունեն: Մեր երկրի սահմանային անվտանգությունը այսօր, մեղմ ասած, տխուր վիճակում է գտնվում:Պետք է մեր սահմանային անվտանգությունն ապահովվի, մարդիկ պետք է կարողանան անվտանգ ապրել և աշխատել Հայաստանի սահմաններում: Վարդենիսը տարիներ շարունակ թշնամուց եղել է տասնյակ կիլոմետրով հեռու, հիմա դարձել է սահմանամերձ և վարդենիսցիների համար լրջագույն խնդիր է այս ամենը հաղթահարել»,-ասաց Թագուհի Թովմասյանը:
Ավելի վաղ «Փաստինֆո»-ն հաղորդել էր, որ գիշերը լարված է եղել Սոթքում: Սահմաններում լարված իրավիճակի, անկանոն կրակոցների պատճառով Սոթքի հանքի 150 աշխատակից տարհանվել է:
Անդրադառնալով միջադեպին պատգամավորն ասաց. «Սոթքում երեկ եղել է լարվածություն, Սոթքի հանքավայրի աշխատակիցներից ոմանք վախեցած են, լարված: Բարեբախտաբար շատ ծանր հետևանքներ չենք ունեցել, բայց չի նշանակում, որ չենք ունենալու, եթե նման միջադեպերը կրկնվեն, կլինեն նաև այլ զարգացումներ»: