Ադրբեջանի ԶՈՒ-երը, ոչ միայն շարունակում են ապօրինի կերպով մնալ ՀՀ տարածքում՝ Սոթք-Խոզնավար հատվածի մասին է խոսքը, շարունակաբար սադրիչ գործողություններ են ձեռնարկում՝ փորձելով վարկաբեկել ՀԱՊԿ համակարգը։ Այս մասին կառավարության նիստի ընթացքում ասաց վարչապետի պաշտոնակատար Նիկոլ Փաշինյանը։ Վերջինս պնդում է, որ ծրագիրը կյանքի կոչելու համար սադրիչ գործողություններին զուգահեռ՝ Ադրբեջանը ՀՀ-ին մեղադրում է իբր սադրանքներ գործելու մեջ։
«Լինելով ՀԱՊԿ անդամ, ով սեպտեմբերից ստանձնելու է կազմակերպության նախագահությունը՝ Հայաստանը հասկանում է ՀԱՊԿ-ի համար անվտանգային սպառնալիքներ չստեղծելու, դաշնակից երկրներին ռազմական գործողությունների մեջ չներքաշելու իր պատասխանատվությունը և ես պաշտոնապես բացառում եմ ՀՀ ԶՈՒ-երի կողմից որևէ սադրիչ գործողություն»։
Փաշինյանը նշեց, որ Ադրբեջանի և մեր փոխադարձ մեղադրանքների իսկությունը պարզելու հարցում ՝ հնարավոր լուծումներից մեկը կարող է լինել ՀԱՊԿ մոնիտորինգային առաքելության տեղակայումը հայ-ադրբեջանական սահմանի երկայնքով, ինչը նախատեսված է ՀԱՊԿ-ի գործողության իրավակարգավորումներով։
«ՀԱՊԿ-ի շրջանակում նման առաքելություն իրականացնելու անհնարինության պայմաններում մեզ համար կարող են լինել միջազգային այլ ընդունելի ֆորմատներ», – ասաց նա։
Փաշինյանը հայտարարեց, որ Ադրբեջանի փորձերը՝ ցույց տալ, թե Հայաստանը դեմ է սահմանների դելիմիտացիա ու դեմարկացիա սկսելու գործընթացին, որևէ կապ չունի իրականության հետ։
«Հակառակը, մենք կողմ ենք, ավելին, նման գործընթաց մեկնարկելու, տարածաշրջանում կայունություն ու խաղաղություն հաստատելու մանդատ ենք ստացել սեփական ժողովրդից։ Դեռևս մայիսի 27-ի ԱԽ նիստում ես բարձրաձայնել եմ մեր պատկերացումները սահմանագծման ու սահմանազատման աշխատանքների մեկնարկի վերաբերյալ», – ասաց նա։
Վարչապետի պաշտոնակատարի խոսքով՝ իմաստ ունի դիտարկել հայ-ադրբեջանական սահմանի ողջ երկայնքով ռուս սահմանապահների հենակետերի տեղակայման հարցը, ինչը հնարավորություն կտա սահմանազատման ու սահմանագծման աշխատանքներն իրականացնել առանց ռազմական բախումի ռիսկի։
Փաշինյանը հավելեց, որ թեման պատրաստվում են քննարկել ռուս գործընկերների հետ։
«Մեր կառավարությունը պատրաստվում է ձեռնարկել բոլոր անհրաժեշտ միջոցները տարածաշրջանում անվտանգություն, խաղաղություն ու կայունություն ապահովելու համար, մենք գործելու ենք ՀՀ քաղաքացիներից ստացած մանդատին համապատասխան», – վաստահեցրեց Փաշինյանը։