«Առաջինը, որ փորձում են լուծել Ադրբեջանն ու Թուրքիան՝ Հայաստանի վրա ճնշումներն ուժեղացնելով հասնել այն բանի, որ Հայաստանը գնա զիջումների՝ մի քանի կարևոր խնդիրներում»,- այս մասին լրագրողների հետ հանդիպմանն ասել է թուրքագետ Ռուբեն Սաֆրաստյանը՝ անդրադառնալով ՀՀ-ի և Ադրբեջանի սահմանամերձ գոտում լարվածության աճին։
Ըստ թուրքագետի՝ թուրք-ադրբեջանական տանդեպը ցանկանում է մասնավորապես զիջումներ կորզել Արցախի կարգավիճակի ու ՀՀ սահմանների հարցում, այնպես անել, որ ՀՀ-ն համակերպվի այն հանգամանքին, որ իր տարածքում գտնվում են ադրբեջանական զորքեր։
«Այս սադրանքներն ունեն կոնկրետ նպատակ՝ ուժեղացնել ճնշումը Հայաստանի վրա և փորձել զիջումներ կորզել ՀՀ-ից»։
Թուրքագետը անդրադարձավ նաև կառավարության նիստում Նիկոլ Փաշինյանի առաջարկին, թե Հայաստանի և Ադրբեջանի փոխադարձ մեղադրանքների իսկությունը պարզելու հնարավոր լուծումներից մեկը կարող է լինել ՀԱՊԿ մոնիթորինգային առաքելության տեղակայումը հայ-ադրբեջանական սահմանի երկայնքով։
Սաֆրաստյանը նշեց, որ սա այն դեպքն է, որ ՀԱՊԿ-ը պետք է լուրջ քննարկի այդ առաջարկը և եթե այս անգամ էլ չկարողանա իրականացնել այն հիմնական գործառույթները, որոնց համար ստեղծվել է՝ լուրջ հարցականի տակ կդնի այդ կազմակերպության ապագան։