Մենք Խորհրդարան չենք եկել, որ լուռ, հլու-հնազանդ զբաղվենք ինչ-որ գործունեությամբ։ Պարզ է, որ մենք այսօր ունենք շատ լուրջ հակադրություն՝ իշխանությունների հետ։ Այս մասին լրագրողների հետ զրույցում ասաց ԱԺ «Հայաստան» խմբակցության պատգամավոր Արմեն Ռուստամյանը։
«Այդ հակադրության առարկան էական է, խոսքը մեր պետության տեսլականի մասին է։ Մեր խորին համոզմամբ՝ այս իշխանություններն ուզում են մի պետություն, որն ուղղակի հրաժարվում է սերունդների առաքելությունից՝ պաշտպանել մեր կենսական շահերը և ապահովել մեր նվաստացած գոյությունը, հնարավորություն տալ, որ այստեղ նսեմացված ժողովուրդը ապրի։ Մեր մոտեցումն է՝ ունենալ այնպիսի պետություն, որ արժանապատիվ կյանք և ապրելու հնարավորություն ապահովվի»,-նշեց Ռուստամյանը՝ հավելելով, որ կառուցողականության մասին խոսք գնալ չի կարող, որովհետև նպատակները տարբեր են, այս մարդիկ թաքուն, քողարկված իրականացնում են մի ծրագիր, որ նսեմացված, հարևանների բոլոր պահանջներին հլու-հնազանդ պետության իրավունքով ապրենք։
Ինչ վերաբերում է հանձնաժողովներին, Ռուստամյանը նշեց, որ դեռևս այդ հարցը չի քննարկվել, կորոշեն, բայց երրորդ և վեցերորդ ընտրությունն իրենցն է, չի բացառվում, որ «Պատիվ ունեմ» դաշինքի հետ կպայմանավորվեն և իրենց քվոտայից կառանձնացնեն։