Պետք է սահման ուղարկել այն բոլոր դղյակների գումարները, որոնք գողացվել են հանրությունից։ ԱԺ-ում այս մասին ասաց «Քաղաքացիական պայմանագիր» խմբակցության պատգամավոր Սերգեյ Բագրատյանը։
Պատգամավորը նշեց, որ բազմաթիվ հրամանատարներ, լինելով միայն զինվորական, կառուցել են քառահարկ հյուրանոցներ։
«Երբևէ հարց առաջացե՞լ է, որ ՀՕՊ-ի համար նախատեսված միջոցներն այդ դղյակներում են պահված։ Կցանկանայի, որ մենք օբյեկտիվ լինենք, և մեր հարցադրումները երկկողմանի լինեն։ Բազմաթիվ սխալներ կան իշխանության գործունեության մեջ, բայց տասնապատիկ ավել սխալներ կան նաև նախորդ իշխանությունների գործունեության մեջ»,-ասաց Սերգեյ Բագրատյանը՝ ընդդիմադիր խմբակցություններին հորդորելով ներողություն խնդրել, որ նման արարքներ են կատարվել։
Սերգեյ Բագրատյանն ասաց, որ չի քվեարկի Իշխան Սաղաթելյանին ԱԺ փոխնախագահի պաշտոնում ընտրվելու համար. «Եթե խմբակցությունը որոշի, որ պետք է քվեարկեմ Իշխան Սաղաթելյանի օգտին, քվեարկելու եմ՝ խմբակցության որոշումը կարևոր համարելով»,-նշեց պատգամավորը։