Իրականում մենք չենք պարտվել, պարտվել է դատավոր Մնացական Հարությունյանը։ Այս մասին լրագրողների հետ զրույցում ասաց փաստաբան Էրիկ Ալեքսանյանը։
Նշենք, որ Վերաքննիչ քրեական դատարանը՝ դատավոր Մնացական Հարությունյանի նախագահությամբ, մերժեց Առուշանյանի նկատմամբ կալանավորումը որպես խափանման միջոց ընտրելու մասին որոշման դեմ պաշտպանների բողոքը։
«Մենք ժպիտով ենք վերաբերում այս ամենին, Առուշ Առուշանյանը, միևնույնն է, գտնվելու է ազատության մեջ»,- նշեց Ալեքսանյանը՝ հավելելով, որ վճռաբեկ բողոք կներկայացվի, թեև Վճռաբեկ դատարանից ևս հույս չունեն։
«Գործնականը ցույց է տալիս, որ պաշտպանները նմանատիպ գործերով շատ ճիշտ են ամեն ինչ կանխորոշում։ Փաստորենք՝ մենք ճիշտ ենք, նրանք՝ ոչ։ Կսպառենք Վճռաբեկ դատարան դիմելու ընթացակարգը, որից հետո միանշանակ դիմելու ենք ԵԴ, որովհետև այս գործընթացը, այս կալանավորման որոշումները որևէ աղերս չունեն իրավաբանության հետ։ Դատավոր Մնացական Հարությունյանը երբեք չի լինի Ազարյան, երբեք չի լինի Մխիթար Պապոյան, Արշակ Վարդանյան, Սերգեյ Մարաբյան։ Նրա անունը միշտ կասոցացվի՝ Արղամանյան Մհերներ, Դանիելյան Արմեններ։ Եթե նրան դա պատիվ է բերում, թող վայելի»,- նշեց Ալեքսանյանը։