Նիկոլ Փաշինյանն ի՞նչ նկատի ուներ՝ ասֆալտին փռել ասելով, և կարո՞ղ էր գործադիրի ղեկավարը քարոզարշավի ժամանակ մուրճ թափ տալ։ Ճեպազրույցի ժամանակ ՀՀ արդարադատության նախարար Կարեն Անդրեասյանին նման հարց ուղղեց լրագրողներից մեկը։
Կարեն Անդրեասյանը նշեց, որ քաղաքական բանավեճի մեջ կարող են լինել այլաբանություններ, սիմվոլներ, որոշակի չափազանցություններ.
«Ինչ վերաբերում է կոնկրետ իրավական գործողություններին, որ օրինակ արել է ոստիկանությունը որևէ մեկի նկատմամբ ուժ կիրառելու պարագայում, այսպիսի ընդհանրական մեկնաբանություններ այստեղ չեմ կարող անել։ Կարող եք կոնկրետ դեպքեր ներկայացնել, մենք դրանց իրավական գնահատականներ կտանք»,-ասաց նախարարը։
Վերջինս ընդգծեց՝ այժմ ուզում է տեսնել կոնկրետ իրավական գործողություններ բոլոր հանցագործներին իրավունքի սահմաններում պատժելու վերաբերյալ։
Հարցին՝ արդյոք Ներքին գործերի նախարարություն ձևավորվելու՞ է, Կարեն Անդրեասյանը նշեց, որ կան նման քննարկումներ, սակայն նա դեռ չի հասցրել այդ հարցը քննարկել գործընկերների հետ։