ՀՀ վարչապետ Նիկոլ Փաշինյանն այսօր հայտարարել է, թե կանխատեսել էին, որ Ադրբեջանը կարող է փակել Սյունիքով անցնող միջպետական ճանապարհը։
«Դե պատասխանեք՝ ինչու՞ Հյուսիս-Հարավ ճանապարհը նախագծելիս այդ ճանապարհը Երասխով չի շարունակվել, Տիգրանաշեն, հետո Զանգակատուն։ Այդ հարցերը մենք չենք բերել օրակարգ։ Բա որ դուք Հյուսիս-Հարավի նախագիծը կազմում էիք, ինչու՞ այդ ճանապարհը չէր անցնում Որոտան-Շուռնուխ հատվածով, այլ նախագծված է այնպես, որ պետք է թունելներ կառուցվեն, ինչը նախագիծը թանկացնում է»,-ԱԺ-ում հայտարարեց Փաշինյանն ու մանրամասնեց, որ հիմա տեղի է ունեցել հետևյալը.
«Խոսքը 21 կիլոմետրանոց հատվածի մասին է, որը ԽՍՀՄ քարտեզներով Խորհրդային Հայաստանի տարածքից դուրս է եղել, այդ տեղերում ադրբեջանցիները եկել, փակել են՝ որպես պատճառ բերելով, թե նախորդ գիշեր միջադեպ է տեղի ունեցել, հայկական կողմից մարդիկ են մտել և դանակահարել են ադրբեջանցի սահմանապահների»,- ԱԺ-ում ելութի ընթացքում ասաց Նիկոլ Փաշինյանը՝ խոսելով Կապան-Գորիս միջպետական ճանապարհի Կարմրաքար-Շուռնուխ հատվածն ադրբեջանցիների կողմից փակելու մասին։
Նա ասաց, որ Սյունիքի մարզը Հայաստանից կտրված չէ, և նրանք կանխատեսել են, որ այսպիսի իրավիճակներ կարող են լինել և այնպես են պայմանավորվել, որ տրանսպորտային երթևեկությունը կարգավորեն և երաշխավորեն, և այդ աշխատանքները կշարունակվեն։
«Բայց այն, ինչ տեղի է ունեցել, հակասում է պայմանավորվածությանը, որը ձեռք է բերվել Հայաստանի և Ռուսաստանի միջև և ամրագրվել է այդ պայմանավորվածությունը։ Էլի եմ ասում՝ եռակողմ հայտարարություն, ինչի պատրաստման մասին ես ասել եմ, չի ստորագրվել։ Սա է ամբողջ խնդիրը»,- ասաց Փաշինյանը։
Նա նշեց, որ Նիկոլ Փաշինյանի խոսքով ռազմավարական առումով Հյուսիս-Հարավ ճանապարհի կառուցումն է լուծելու այդ հարցը, բայց ոչ ամբողջապես։ Նաև Շուռնուխ և Որոտան համայնքների ճանապարհների լավարկման հետ կապված աշխատանք է սկսվել։