ՀՀ սահմանը սկսվում է Մեղրիից և իրանական մեքենաները Հայաստան մտնելու հետ կապված խնդիր չունեն, բայց Երևան հասնելու հետ կապված խնդիր ունեն։ Լրագրողների հետ զրույցի ժամանակ ասաց ՀՀ էկոնոմիկայի նախարար Վահան Քերոբյանը՝ անդրադառնալով ադրբեջանցիների կողմից փակ պահվող Գորիս-Կապան միջպետական ճանապարհին։
Նախարարի խոսքով այդ խնդիրն այս պահին լուծվում է շրջանցող ճանապարհի միջոցով, որը հարմարեցված չէ խոշոր բեռնատարների անցման համար, բայց այդ ճանապարհն աշխատում է և այնտեղով բեռներն անցնում են։
«Մենք շատ մտահոգված և անհանգստացած ենք այդ ճանապարհի փակմամբ և ամեն ինչ անում ենք, որ օր առաջ այն բացվի»,-ասաց Վահան Քերոբյանը։
Դիտարկմանը, որ 30 տարի շարունակ Հայաստանի ճանապարհները բողոքի ակցիաներից բացի այլ նպատակներով չեն փակվել, իսկ հիմա Հայաստանի սուվերեն տարածքում թշնամու զորքերը փակել են ճանապարհն ու խոչընդոտում են տրանսպորտային տեղաշարժը, Վահան Քերոբյանն ասաց, որ կառավարությունն ամեն ինչ անում է, որ ժամ առաջ ճանապարհը վերաբացվի։
«Ինչքանով ես եմ տեղյակ հենց հիմա եռակողմ ինտենսիվ բանակցություններ են ընթանում, որ այդ ճանապարհը շուտափույթ բացվի»,-ասաց նախարարը։
Հարցին՝ արդյոք մենք դարձել ենք այդքան թույլ պետություն, որ թշնամին պետք է նստի մեր երկրում, իսկ մենք բանակցենք, խնդրենք, որ նա գնա, էկոնոմիկայի նախարարը նկատեց՝ հարցերը լուծելու տարբեր ճանապարհներ կան։ Վահան Քերոբյանը վստահություն հայտնեց, որ երկրի այսօրվա ռազմաքաղաքական ղեկավարությունը նախընտրում է հարցերը լուծել ոչ ուժային մեթոդներով։