Այսօր խորհրդակցություն ենք ունեցել, որ ապահովենք Սյունիքի որոշ գյուղերի պարենային անվտանգությունը։ Լրագրողների հետ զրույցի ժամանակ ասաց ՀՀ էկոնոմիկայի նախարար Վահան Քերոբյանը՝ անդրադառնալով հարցին, թե մինչև Գորիս-Կապան ճանապարհի բացումն ինչպես են պատրաստվում օգնել այդ բնակավայրերի բնակիչներին։
«Կան տարբերակներ այդ հարցը շրջանցող ճանապարհի միջոցով լուծելու, այնպես որ փորձում ենք այդ հարցը լուծել»,-ասաց Վահան Քերոբյանը։
Նախարարն ասաց, որ ամեն բնակավայրի առումով գիտակ չէ, բայց թիմն աշխատում է այդ ուղղությամբ. «Սովետական միության այն սահմանները, որոնք եղել են մինչև ԽՍՀՄ փլուզումը, այդ ճանապարհի որոշ հատվածներ ընկնում են ադրբեջանական ԽՍՀ տարածքում՝ դուք էլ լավ գիտեք»,-նշեց Վահան Քերոբյանը՝ հավելելով, որ 1988-ի քարտեզի մասին է խոսքը։