Մարտակերտ քաղաքում հայտնաբերված ադրբեջանցի զինծառայողի վերաբերյալ քրեական գործն ընդունվել է Արցախի քննչական կոմիտեի վարույթ։ Հայտնում է պաշտոնական կայքը։
«ԱՀ քննչական կոմիտեի հատկապես կարևոր գործերով քննության վարչությունում, վարույթ է ընդունվել Ադրբեջանի Հանրապետության զինված ուժերի զինծառայող՝ Ջամիլ Բաբաևի կողմից ԱՀ պետական սահմանն ապօրինի հատելու, ԱՀ Մարտակերտ քաղաքի Տերյան փողոցի համար 12 տան անչափահաս բնակիչներին սպանության սպառնալիքներ տալու և լրտեսության դեպքի առթիվ ԱՀ քրեական օրենսգրքի 316-րդ հոդվածի 1-ին մասի, 350-րդ հոդվածի 1-ին մասի և 135-րդ հոդվածի 1-ին մասի հատկանիշներով հարուցված քրեական գործը։
Ջ.Բաբաևը ձերբակալված է։
Իրականացվում են անհետաձգելի քննչական և դատավարական գործողություններ դեպքի բոլոր հանգամանքները պարզելու ուղղությամբ։
Նախաքննությունը շարունակվում է»,-ասված է հաղորդագրության մեջ։
Հիշեցնենք, որ 2 օր առաջ ադրբեջանցի էր մտել Մարտակերտի տներից մեկը։
Տանը 2 անչափահաս տղա երեխաներ են եղել։ Ադրբեջանցին մտել է տուն՝ հաց և ծխախոտ ուզել։ Երեխաները ուտելիք են տվել նրան, իսկ եղբայրներից մեկն առաջարկել է խանութ գնալ և ծխախոտ գնել։
Տնից դուրս գալուց հետո տղան զանգել է ոստիկանություն, որից հետո էլ ոստիկանները եկել և ձերբակալել են ադրբեջանցուն։