Այսօր Անհայտ կորած անձանց միջազգային օրն է, որը հիշատակում է հակամարտությունների, բռնության, գաղթի, բնական աղետների հետևանքով անհայտ կորած անձանց։
«Կարմիր խաչի միջազգային կոմիտեի աջակցությամբ երկար տարիներ աջակցել ենք Ղարաբաղյան հակամարտության 1990-ականների սրացման հետևանքով անհայտ կորած անձանց ընտանիքներին։ Ցավոք 2020 թվականի սրացման հետևաքով ևս ունենք անհայտ կորածներ»,- նշել են ԿՄԽԿ Հայաստանյան գրասենյակից՝ կից հրապարակելով անհայտ կորած հայ զինծառայողների հարազատների մասնակցությամբ նկարահանված հոլովակը։
Անհայտ կորած զինծառայողների հարազատներն անորոշության մեջ են, չգիտեն՝ որտեղ են իրենց որդիները, ողջ են, թե՝ ոչ։
«Չգիտեմ՝ որտեղ է, չգիտեմ՝ ողջ է, թե ոչ, ոչինչ չգիտեմ »,- ասում է Հայկանուշ Մուրադյանը, ում որդին անհայտ կորել է 2020թ Ադրբեջանի կողմից սանձազերծված պատերազմի հետևանքով։
«Օրը բացվում է իրենով, մթնում է՝ իրենով։ Սպասում եմ ամեն օր, ամեն րոպե, ամեն ժամ»,- նշեց նա՝ հավելելով, որ դա ավելի վատ է, քան իմանալը, որ իրենց որդին զոհված է։