Հայ գերիների նկատմամբ խոշտանգումներ եղել են անգամ այն ժամանակ, երբ քաղաքացիական անձը ընդամենը 3-4 ժամ է գտնվել Ադրբեջանի վերահսկողության տակ: Այս մասին ասուլիսի ժամանակ ասաց Արցախի ՄԻՊ Գեղամ Ստեփանյանը.
«Խոսքը օրինակ հուլիսի 26-ին Մաճկալշեն համայնքից գերեվարված անձի մասին է, որը գերեվարությունից հետո 4 ժամ է գտնվել Ադրբեջանի ԶՈՒ վերահսկողության տակ, սակայն նրա նկատմամբ կիրառվել էին խոշտանգումներ և անմարդկային վերաբերմունք, մասնավորապես՝ աջ ոտքի վնասվածք էր ստացել նա և գտնվում էր հոգեբանական շատ ծանր իրավիճակում, սա այն դեպքում, երբ այդ մարդն ուներ հոգեբանական խնդիրներ, այսինքն՝ հաշվի չի առնվել մարդու այդ կարգավիճակը»,-ասաց Արցախի ՄԻՊ-ը:
Վերջինս նաև նշեց, որ անմարդկային վերաբերմունք է դրսևորվել նաև անհետ կորածների հարազատների նկատմամբ.
«Երբ մեր զինծառայողների հեռախոսները հայտնվել են ադրբեջանցի զինվորների ձեռքին, նրանք պարբերաբար օգտագործել են մեր զինվորների օգտահաշիվները՝ նրանց հարազատներին ցավ պատճառելու համար»,-ասաց նա:
Արցախի ՄԻՊ-ը նաև ընդգծեց, որ Ադրբեջանը ինտենսիվ կերպով թիրախավորում է խաղաղ բնակավայրերը.
«Հատկապես Շուշիի կողմից ամենօրյա ռեժիմով խախտվում է հրադադարը և ադրբեջանական կողմը կրակ է բացում հայկական բնակավայրերի ուղղությամբ, մասնավորապես՝ Շոշ և Մխիթարաշեն համայնքների ուղղությամբ»,-ասաց Գեղամ Ստեփանյանը և ընդգծեց, որ պետք է մեխանիզմներ կիրառել, որոնց միջոցով հնարավոր կլինի ֆիքսել, թե ո՞ւմ կողմից և ի՞նչ հանգամանքներում է խախտվել հրադադարը: