Հայաստանի Հանրապետության փոխվարչապետ պարոն Սուրեն Պապիկյանին՝ Հայաստանի «Հաճըն» հայրենակցական միության ատենապետ Հովհաննես Գրիգորյան-Ճարպիկյանի և մարզային գրասենյակների ղեկավարությունների կողմից
Դիմում-խնդրանք
Մեծարգո՛ պարոն Պապիկյան, Հայաստանի «Հաճըն» հայրենակցական միության և մարզային գրասենյակների ղեկավարությունները ծանոթացել են նոր օրենսդրական նախագծին, համաձայն որի՝ նախատեսվում է ձևավորել համայնքների հետևյալ փունջը՝ ՀՀ Կոտայքի մարզի Նաիրի խոշորացված համայնք Եղվարդ (արդեն խոշորացված 6 համայնք՝ 25.708 բնակիչ, Արգել, Գետամեջ, Մրգաշեն, Նոր Արտամետ, Նոր Գեղի, Նոր Հաճն, Պռոշյան, Քանաքեռավան, Քասախ՝ 67000 բնակիչ):
Ցանկանում ենք մեր անհանգստությունը և մտահոգությունը հայտնել այս նախագծի առնչությամբ:
Վստահ ենք, որ ծանոթ եք պատմական հայոց Կիլիկիայի Հաճըն քաղաքի պատմությանը, մասնավորապես՝ Հաճընի ութամսյա դյուցազնամարտերին: Անշուշտ, տեղյակ եք նաև, որ քեմալականները 1920 թ. հոկտեմբերին մեկ օրում կոտորեցին 8000 հաճընցիների՝ չխնայելով ո՛չ կանանց, ո՛չ երեխաներին ու ծերերին:
Սակայն Հաճըն անունը չջնջվեց պատմության էջերից, քանի որ կոտորածից մազապուրծ մի բուռ աշխարհասփյուռ հաճընցիները ստեղծեցին հայրենակցական միություններ, իսկ 1958 թ. նոյեմբերին Սփյուռքի հաճընցիներին տարածք հատկացվեց Խորհրդային Հայաստանում, որտեղ և վերածնվեց Հաճըն քաղաքը՝ Նոր Հաճն անվանմամբ:
Այսoր Նոր Հաճնը զարգացած, ինքնաբավ և գողտրիկ քաղաք է, որն ունի քաղաքապետ, ուրույն մշակույթ և ավանդույթներ, արդյունաբերություն ու շինարարություն: Կիլիկիո Հաճընի սերունդները շարունակում են վառ պահել պատմական քաղաքի հուշերը՝ նոր սերնդին դաստիարակելով հայրենասիրական ոգով, անցյալը պահպանելու գիտակցությամբ և կազմակերպելով հերոսների ոգեկոչման միջոցառումներ՝ միտված հայոց պահանջատիրությանը:
Այս ամենը հաշվի առնելով՝ ցանկալի կլիներ, որ Նոր Հաճնը շարունակեր պահպանվել որպես քաղաք, կամ էլ, ծայրահեղ դեպքում, Նոր Հաճնի բնակչության, ՏԻՄ մարմինների և սփյուռքահայության համար անհրաժշետ է նախատեսել և ստեղծել խոշորացման հետևյալ փունջը՝ Նոր Հաճըն խոշորացված համայնք, որը կներառի Գետամեջը, Արտամետը, Մրգաշենը, Քանաքեռավանը, Նոր Գեղին, Արգելը, Քարաշամբը, Թեղենիքը: Կարծում ենք, որ սա անհրաժեշտ է նաև Նոր Հաճնի անկախության և սփյուռքահայերի հետ ուղղակի կապի պահպանման տեսանկյունից:
Հարգելի՛ պարոն Պապիկյան, հուսով ենք, որ համայնքների խոշորացման գործընթացում հաշվի կառնվվեն նաև Հայաստանի «Հաճըն» հայրենակցական միության և մարզային գրասենյակների ղեկավարությունների կարծիքներն ու ցանկությունները:
Հարգանքով՝ Հայաստանի «Հաճըն» հայրենակցական միության ատենապետ Հովհաննես Գրիգորյան-Ճարպիկյան և մարզային գրասենյակների ղեկավարներ
Մեր հասցեն՝ Արշակունյաց 4, Մամուլի շենք, 13-րդ հարկ
Հեռ.՝ 077 400-955
tesaketakumb@gmail.com
01.09.2021 թ.