Վառ ու գունեղ ատրակցիոններ, խնամված ու կանաչապատ տարածք, փուչիկներով մուլտհերոսներ, հաճելի երաժշտություն՝ այսքանից առավել ի՞նչ է պետք ցանկացած երեխայի՝ կյանքն է՛լ ավելի հետաքրքիր ու հեքիաթային դարձնելու համար: Արդեն քանի՜-քանի սերունդ է զվարճացել ու զվարճանում այս հրաշալի միջավայրում, որի անունն է «Լունապարկ»:
Ի դեպ՝ բոլորովին վերջերս շատերին ծանոթ ու սիրելի այգին համալրվել է նոր ատրակցիոնով, իսկ այգու տնօրինությունն անում է հնարավորինս ամեն ինչ, որպեսզի յուրաքանչյուր տարի «Լունապարկում» նորություններ լինեն: Այս ու բազմաթիվ այլ թեմաների շուրջ Tesaketinfo.am-ը զրուցեց «Լունապարկի» (ՍԿՈԲ ՍՊԸ-ի) տնօրեն Վոլոդյա Վարդանյանի հետ:
«Քանի որ այգին կենտրոնում է, այստեղ միշտ բազմամարդ է լինում, ուստի փորձում ենք ամեն ինչ անել, որպեսզի յուրաքանչյուր այցելու հոգեպես բավարարված զգա իրեն: Մեծ ուշադրություն ենք դարձնում այգու մաքրությանը, կանաչապատմանը, գեղեցիկ ձևավորմանը…
Աշխատանքներն այնպես ենք կազմակերպել, որ, կարուսելներից բացի, այստեղ նաև սրճարան լինի՝ մարդկանց հարմարավետության նպաատակով: Այգին ոչ միայն մանուկների համար է, այստեղ հաճախ մեծահասակներ էլ են զբոսնում, ընտանիքներով են գալիս, և շատ լավ է, երբ քո արածը մարդիկ կարողանում են գնահատել: Այնքան հաճելի է, երբ գալիս ես աշխատանքի, տեսնում թե՛ ամեն օր այստեղ զբոսնող, թե՛ նոր այցելող մարդկանց, որոնք մոտենում են և անկեղծ շնորհակալություն հայտնում…՛՛,-նշեց մեր զրուցակիցը:
Անշուշտ, այգու այցելուների դրական վերաբերմունքը պայմանավորված է ոչ միայն հաճելի միջավայրով, այլև, ու թերևս՝ ամենակարևորը, անվտանգությամբ: Խոսքը թե՛ ատրակցիոնների անվտանգության մասին է, թե՛ առհասարակ այգում քայլելիս ապահով լինելու: Ինչպես նշեց պարոն Վարդանյանը՝ այս կարևորագույն գործառույթն իրականացնում են ոստիկանները: «Այգում երբեք թույլ չենք տալիս հասարակական կարգի խախտում. ոստիկանները միշտ այստեղ են, նայում են, հսկում, որևէ խնդիր լինելու դեպքում մոտենում, կիրթ ու քաղաքավարի կերպով միջամտում են և լուծում բոլոր հարցերը: Հակաիրավական որևէ բան մեզ մոտ երբեք չի լինում: Իսկապես շատ շնորհակալ եմ ոստիկաններին»,-ասաց Վոլոդյա Վարդանյանը:
Նա անդրադարձավ նաև ատրակցիոնների անվտանգությանը՝ նշելով, որ բոլոր կարուսելները ամեն առավոտ փորձարկվում են, որից հետո միայն թույլ է տրվում դրանք գործի դնել:
«Տեխնիկայի անվտանգության զննման հատուկ կազմակերպություն կա, որի մասնագետները մշտապես ստուգումներ են անցկացնում»,-վստահեցրեց «Լունապարկի» տնօրենը՝ հավելելով, որ այգու աշխատակիցները ևս բավականաչափ զգոն են ու պատրաստված, նրանք նույնպես հետևում են կարուսելների անվտանգությանը:
«Երևի նկատել եք, որ փորձում ենք մեր աշխատանքներում հնարավորիս շատ ընդգրկել երիտասարդների, սակայն չենք անտեսում նաև մեր հին աշխատողներին: Երիտասարդների կողքին անպայման պիտի լինեն տարիների փորձ ունեցող աշխատողներ՝ իրենց մասնագիտական փորձը փոխանցելու նպատակով: Ճիշտ է, սա սեզոնային աշխատանք է, լինում են կրճատումներ, որոնք մեզնից կախված չեն, սակայն փորձում ենք այնպես անել, որ աշխատողների գոնե մի մասին մինչև տարվա վերջ պահենք»,-ասաց պարոն Վարդանյանը:
Խոսելով ատրակցիոնների ձեռքբերման մասին՝ նա նշեց, որ դրանք հիմնականում բերվում են Ռուսաստանից, ինչպես, օրինակ, վերջին կարուսելը, սակայն կան նաև Չինաստանից բերվածներ:
«Գրեթե ամեն տարի թարմացնում ենք, բայց դրա համար ֆինանս է պետք, սակայն, ինչպես ժողովուրդն է ասում, մարդն իր վերմակի չափով պիտի ոտքերը մեկնի: Մենք էլ հնարավորության դեպքում փորձում ենք թարմացնել ատրակցիոնները, գիտեք, սա էլ է մրցակցություն՝ ազատ շուկայում… Ինչ վերաբերում է գներին, աշխատում ենք չբարձրացնել: Հովանավորներ չունենք, մեր եկամուտը ձևավորվում է մեր հասույթից, նաև այգին հիմնադիր ունի: Մենք աշխատում ենք ուրիշին նեղություն չտալ, մեր հարցերն ինքներս լուծել, իսկ օգնության համար որևէ մեկին չենք դիմել…»,-ասաց Tesaketinfo.am-ի զրուցակիցը:
Նա հավելեց նաև, որ այգու տարածքն իրենք վարձակալում են, միջոցառումներ հաճախ չեն կազմակերպում, որովհետև դրանց համար ևս ֆինանսական միջոցներ են հարկավոր, սակայն Հունիսի մեկին՝ Երեխաների պաշտպանության միջազգային օրը, մանկական ատրակցիոններն անվճար են լինում:
«Ունենք նաև կարուսելներ, որոնք, անկախ տոնական օր լինել-չլինելուց, անվճար են մինչև հինգ տարեկան երեխաների համար. մեծահասակի հետ միասին նստող երեխան անվճար է օգտվում ատիակցիոնից»,-նշեց Վոլոդյա Վարդանյանը:
Անդրադառնալով այգու սանիտարահիգիենիկ վիճակին՝ նա ասաց, որ մեծ ուշադրություն է դարձվում այգու մաքրությանը: Եվ իսկապես՝ այսօրվա սանհանգույցն անհամեմատելի է տարիներ առաջ եղածի հետ: «Հիմնովին փոխել ենք, աշխատողը մշտապես հետևում է մաքրությանը»,-ասաց տնօրենը:
Մաքրության աշխատանքները պաշաճ կատարելուց զատ՝ այստեղ մեծ ուշադրություն է դարձվում նաև կանաչապատմանը, ընդ որում՝ ոչ միայն բուն այգու տարածքում, այլև Սուրբ Գրիգոր Լուսավորիչ եկեղեցուն կից հատվածում:
Այս առնչությամբ մեր զրուցակիցն ասաց. «Եկեղեցու տարածքի մի մասը մեր այգուն է հարում, կանաչապատումն անելիս մենք այդ ուղղությամբ ևս կատարում ենք աշխատանքներ՝ ճիշտ է՝ որքան ֆինանսական հնարավորությունները թույլ տան: Եթե ֆինանսական վիճակը ներեր, ավելի մեծ տարածք կընդգրկեինք դեպի եկեղեցի՝ կանաչապատելու համար. ցանկացած հայի պարտքն է եկեղեցու հանդեպ ունենալ ամենաբարձր պատասխանատվություն»:
Վոլոդյա Վարդանյանը նշեց, որ այգու սկզբնական հատվածում երկու տեղ կա, որոնք կանաչապաատվում են, ծաղիկներ են տնկվում, դրանք այգու տարածքները չեն, սակայն իրենք այդտեղ ևս աշխատանքներ են իրականացնում: Անցյալ տարի ոռոգման ջրի հետ կապված խնդիր առաջացավ, սակայն կանաչապատման գործընթացը դրանից չտուժեց, իսկ խնդիրն այսօր, բարեբախտաբար, արդեն վերացված է: Այգու տնօրենը հույս հայտնեց, որ արդեն մյուս տարի այդ տարածքները կրկին կկանաչապատվեն:
«Վերևում լիճ կա, մենք ջուրն այնտեղից ենք վերցնում, օգտագործում ենք, աշխատանքները վերջացնելուց հետո՝ անջատում, այսինքն՝ ջրի կորուստ չենք ունենում, անտեղի չենք վատնում»,-վստահեցրեց այգու տնօրենը:
«Լունապարկում» իրականացվող բազմաթիվ աշխատանքները սեփական աչքերով տեսնելուց հետո, բնականաբար, հարց առաջացավ, թե այս ամենն արդյոք չի՞ գնահատվում որևէ կերպ: Մեր հարցին ի պատասխան՝ պարոն Վարդանյանը նշեց, որ տարբեր ժամանակներում իրենք արժանացել են տարբեր դիպլոմների, շնորհակալագրերի ու պատվոգրերի, անգամ ԱՊՀ երկրների շրջանում «Լունապարկը» հաջողություններ է ունեցել: Եվ իսկապես, ինչպես ասել է ամենայն հայոց բանաստեղծը, «գործն է անմահ, լա՛վ իմացեք», իսկ գործ «Լունապարկում» վստահաբար արվում է՝ վկա հարյուրավոր երեխաների ժպիտները, որոնք պայծառացնում են նրանց դեմքերը «Լունապարկ» այցելելիս:
Ամալյա Հովհաննիսյան
Tesaketinfo.am