Նախորդ օրերին մենք ականատես եղանք ադրբեջանական զինված ուժերի հերթական, ապօրինի գործողություններին և, ցավոք սրտի, մեր իշխանությունների կրավորական և ոչ մի բացատրություն չտվող կեցվածքին: ԱԱԾ հայտարարությունը ոչ միայն չի բխում մեր անվտանգության շահերից, այլև անատամ է և ոչինչ չասող: Այս մասին ԱԺ նիստին ասաց «Հայաստան» խմբակցության քարտուղար Արծվիկ Մինասյանը՝ անդրադառնալով Որոտան բնակավայրի մոտ Ադրբեջանի կողմից ոստիկանական կետ տեղադրելուն:
Նա նաև հայտարարեց, որ «Հայաստան» խմբակցությունը քննարկում է պահանջում՝ սահմաններին ստեղված իրավիճակի հետ կապված.
«Այս ընթացքում մենք որևէ հիմնավորում և որևէ բացատրություն չտեսանք իշխանությունների կողմից:
Ելնելով այն հանգամանքից, որ մենք խորհրդարանական կառավարման երկիր ենք՝ «Հայաստան» խմբակցությունը պահանջում է, որ որևէ ձևաչափով քննարկում կազմակերպել, որպեսզի մենք կարողանանք հասկանալ՝ ի՞նչ է կատարվում , հատկապես, երբ ԱԱԾ հայտարարությունն արդեն ամբողջական օգտագործում է ադրբեջանական տերմինաբանությունը»,-ասաց Մինասյանը;