ԱԱԾ-ն հայտարարություն տարածեց՝ Որոտանին կոչելով ադրբեջանական անվանունով, որը չեմ ցանկանում կրկնել։ Սա ի՞նչ է նշանակում, մեզ կամաց-կամաց սովորեցնում են, որ դա ադրբեջանական տարածք է, իսկ Սև լճի տարածքում ադրբեջանցի զինծառայողները պատրաստվում են ձմեռվան։ Այս մասին լրագրողների հետ զրույցում ասաց «Հայաստան» խմբակցության պատգամավոր Վահե Հակոբյանը։
Հիշեցնենք, որ Գորիս-Կապան միջպետական ճանապարհին ադրբեջանցիներն անցակետ են տեղադրել։ Ըստ ՀՀ ԱԱԾ տարածած պաշտոնական հաղորդագրության՝ Ադրբեջանի Հանրապետության ոստիկանության կողմից իրականացվում է իրանական պետհամարանիշներով բեռնատարների վարորդների ու բեռի փաստաթղթերի ստուգում։ Ընդ որում՝ ԱԱԾ տարածած հաղորդագրության մեջ նշվել էր Որոտանի ադրբեջանական անվանումը՝ «Էյվազլի»։
Վահե Հակոբյանը լրագրողների հետ զրույցում նշեց, որ ամենաթողության և ամեն ինչ զիջելու պարագայում ադրբեջանական կողմը լկտիանում է։ Նրա խոսքով՝ Որոտանի կողքը ոստիկանական հենակետ են տեղադրել, կանգնեցնում են պարսկական բեռնատարեր, մեքենաներին ստիպում են իրենց պատկերացմամբ՝ մաքսատուրք, պետական տուրք են մուրում և գանձում։
«Այսօր այլ կարևոր խնդիր քան Սյունիքն է, չենք կարող ունենալ։ Ի՞նչ դատավոր, ի՞նչ ԲԴԽ, ի՞նչ Ջհանգիրյան։ Պատկերացնում եք, չէ՞, որ ադրբեջանական կողմը ցանկացած պահի կարող է կտրել Կապանը»,- ընդգծեց Հակոբյանը։
Իսկ թե ինչու հանրությանը չէին իրազեկել այդ հենակետի մասին և հարցին՝ արդյոք նորմալ է, որ մարզպետը լուսանկարից է իմանում, Վահե Հակոբյանն ընդգծեց, որ նորմալ չէ, որ մարզպետը լուսանկարից է իմանում, նորմալ չէ, որ ԱԱԾ-ն է հաղորդագրություն տարածում, երբ արդեն համացանցում հայտնվել է այդ տեղեկատվությունը։
Ինչ վերաբերում է խնդրի լուծման տարբերակներին, ապա Հակոբյանը նշեց, որ խնդրի լուծման տարբերակը Նիկոլ Փաշինյանի անհապաղ հեռացումն է, դա բոլոր խնդիրների լուծումն է։
Բացի այդ՝ անվտանգային խնդիրներից զատ առկա է նաև տնտեսական խնդիր, մասնավորապես, Հակոբյանը նշեց, որ ապրանքաշրջանառության 40 տոկոսից ավելին կատարվում է Պարսկաստանի կողմից, ինչը վտանգված է։ Հակոբյանը համոզված է՝ Իրանից արձագանք կլինի։
Անդրադառնալով Սյունիքի կալանավորված համայնքապետերին՝ Հակոբյանը նշեց. «Հիմա պատկերացրեք Առուշանյանը լիներ իր քաղաքում, ինչ էր կատարվելու։ Դրա համար էլ մերժեցին Առուշանյանի խափանման միջոցի փոփոխման միջնորդությունը»։