Կեսգիշերին կրակոցների ձայներ են լսվել Սյունիքի մարզի Կապանի շրջանի Ներքին Հանդ գյուղի տարածքում: Տեղեկությունը «Փաստինֆո»-ին հայտնեց գյուղի վարչական ղեկավար Խաչատուր Բաղդասարյանը։
«Կրակոցները եղել են մեզ մոտ. 10 կմ-ի վրա՝ բարձրունքում, մենք պոստ ունենք։ Այնտեղ է եղել միջադեպը։ Կրակոցը լսել ենք, բայց շատ տեղեկություններ չունեմ։ Մենք էլ ենք տեղեկացել, որ մեկ զոհ ունենք, մեկ վիրավոր»։
Ներքին Հանդի վարչական տարածք է ժամանել շտապօգնության մեքենա, վիրավորին տեղափոխել։ Դիրքերը գտնվում են գյուղից 10 կմ հեռավորության վրա, բայց շատ մոտ են ադրբեջանական դիրքերին։
«Դիրքերից ադրբեջանցիները շատ մոտ են՝ մոտ 200-400 մետր։ Կրակոցները եղել են 23։00-00։00-ի սահմաններում։ Կրակոցը երկու անգամ ենք լսել, մեր քնի ժամն էր, առավոտյան տեղեկություններն իմացանք»։
ՀՀ ՊՆ-ն ավելի վաղ հայտնել է, որ նախօրեին, ժամը 22:00-ի սահմաններում, ՀՀ հարավ-արևելյան ուղղությամբ տեղակայված մարտական հենակետերից մեկում մահացու հրազենային վիրավորում է ստացել 1978թ. ծնված Մկրտիչ Սերյոժայի Հովակիմյանը: Ըստ պաշտոնական վարկածի` պահեստազորի սերժանտը մահացու հրազենային վիրավորում է ստացել մարտական ծառայության կազմակերպման կանոնների խախտման հետևանքով:
Պաշտպանության նախարարությունից «Փաստինֆո»-ին հայտնեցին, որ Հովակիմյանը եռամսյա վարժական հավաքների մասնակից էր՝ պահեստազորի սերժանտ։ Սակայն ՊՆ-ից չպարզաբանեցին, թե սերժանտը երբ էր զորակոչվել եւ արդյոք անցել է բավարար մարտական պատրաստություն, նախքան մարտական հենակետ տեղափոխվելը։
Հիշեցնենք, որ Երևանում ու մարզերում օգոստոսի 25-ին մեկնարկել է պահեստազորի վարժական եռամսյա հավաքը։ Հաջորդ եռամսյա վարժական հավաքը Պաշտպանության նախարարությունը նախատեսում է անցկացնել արդեն սեպտեմբերի 15-ից մինչև դեկտեմբերի 15-ը: Հավաքի մասնակիցները մասնակցում են նաև մարտական հերթափոխի։