Սրանք առերևույթ հանցակազմ պարունակող գործողություններ են, և այդ ուղղությամբ պետք է բացատրություն տրվի՝ արդյոք հարուցվա՞ծ են քրեական գործեր։ Լրագրողների հետ զրույցի ժամանակ ասաց ԱԺ «Հայաստան» խմբակցության քարտուղար Արծվիկ Մինասյանը՝ անդրադառնալով ԱԱԾ-ի, իսկ ավելի վաղ նաև վարչապետի կողմից ադրբեջանական տեղանուն օգտագործելուն։
«Պետք է բացատրեն՝ կատարվե՞լ են անհրաժեշտ քննչական գործողությունները, թե ոչ։ Կարո՞ղ է իսկապես բացահայտվի, որ հերթական անգամ գործ ունենք գաղտնի պայմանավորվածության հետ, որը քրեական օրենսգրքի մի շարք հոդվածներով դատապարտելի արարք է»,-նշեց Արծվիկ Մինասյանը։
Հարցին՝ արդյոք իր համար պա՞րզ էր, թե ավելի վաղ ի՞նչ բանակցությունների արդյունքում թշնամին բացեց Գորիս-Կապան ճանապարհը, Արծվիկ Մինասյանն ասաց, որ տեղյակ չէ և առաջին դեմքերի հետ հանդիպման նպատակը նաև այն է, որ այդ հարցերի պատասխանները ստանան։
«Իսկապես կարող է գործ ունենանք այնպիսի իրավիճակի հետ, որտեղ միջազգային հանրության առավել ակտիվ ներգրավվածությունն է պահանջվում, բայց քանի որ իշխանությունը գործում է ինքն իր մեջ պարփակված և միայն թշնամու հետ համագործակցության օրակարգով, մեզ համար այս պահին այդ պատուհանը բացելու անհրաժեշտություն կա»,-ասաց Արծվիկ Մինասյանը։
Վերջինս նշեց, որ հայկական կողմը քայլեր պետք է ձեռնարկի։ Եթե իշխանությունն ի վիճակի չէ կամ այնպիսի պարփակված վարքագծի մեջ է գտնվում, որ չի կարողանում այդ գործողությունը ձեռնարկել, նշանակում է՝ բոլորն այստեղ անելիքներ ունեն։